Gjatë ceremonisë përkujtimore të 22-vjetorit të rënies në fushën e betejës së Heroit të Kombit, Luan Haradinaj si dhe të Veprimtarit të Çështjes Kombëtare, Ismail Haradinaj, kryeministri Ramush Haradinaj foli edhe për kufirin shqiptaro-shqiptar.
Pas homazheve të bëra tek shtatorja e Heroit Luan Haradinaj, kryeministri tha se ai ishte ndër të parët e këtij brezi, e të fundit të UÇK-së, që kanë pas nderin me qenë bashkëluftëtarë të shumë prej atyre që kanë rënë për liri, por edhe të atyre që sot i takon të gjallë në Deçan.
“Ai ka rënë me 6 maj 1997 në kufirin shqiptaro-shqiptarë, të cilin nuk kemi pranuar asnjëherë të na ndajnë. Ndër të parët që e ka refuzuar atë ka qenë Luani, e ku ka kalu nëpër të sikur të kalonte në tokën e vetë, e jo sikur nga një tokë në tjetrën. Pra nuk e ka përfillë këtë kufi, e ramja e tij në këtë kufi është porosi që nuk do të lejojmë ndarje në mes shqiptarëve”, tha Haradinaj.
Kryeministri shtoi gjithashtu se do të nderohet vepra e shqiptarëve, jo vetëm të Ismail Haradinajt, por e të gjithë brezave heroikë.
“Të gjithën do t’i nderojmë me punë. Lavdi e përjetshme”, përfundoi ai.