By admin4 
Pesë persona kanë mbetur të plagosur pas një serie sulmesh të dhunshme në rrugët e Edinburgut, ndërsa autoritetet skoceze kanë nisur një hetim të gjerë për terrorizëm.
Një 36-vjeçar skocez është arrestuar dhe akuzohet për kërcënime, grabitje dhe vandalizëm. Sipas policisë, tre nga të lënduarit janë dërguar në spital, por fatmirësisht plagët e tyre nuk konsiderohen kërcënuese për jetën.
Pamjet e publikuara në rrjetet sociale tregojnë një burrë pa bluzë duke lëvizur nëpër rrugët e kryeqytetit skocez me një sëpatë në dorë, teksa sulmon njerëz dhe dëmton biznese lokale.
Sulmet nisën pranë një xhamie, ku fillimisht u plagosën dy persona. Më pas, edhe tre burra të tjerë, të moshës nga 22 deri në 39 vjeç, u sulmuan në zona të ndryshme të qytetit.
Sipas Shoqatës Skoceze të Xhamive dhe organizatës kundër racizmit MEND, shumica e viktimave ishin myslimanë. Organizata MEND bëri të ditur se i dyshuari dëgjohej në video duke bërtitur se vendi duhet të “mbrohet” nga myslimanët.
Kryeministri i Skocisë, John Swinney, deklaroi se ishte thellësisht i shqetësuar nga incidenti dhe theksoi se dhuna, racizmi dhe intoleranca nuk kanë vend në Skoci.
Ndërkohë, kryeministri britanik, Keir Starmer, tha se ngjarja duket të ketë qenë e motivuar nga urrejtja anti-myslimane.
“Dhuna dhe urrejtja nuk kanë vend në shoqërinë tonë”, deklaruan autoritetet, ndërsa hetimet për motivet e sulmit vazhdojnë.
admin7