LSDM: Gjysmë miliard kredi në katër sy, a është ky çmimi i mbrojtjes së Gruevskit?
“Më në fund u hapën kartat dhe u bë e qartë pse Mickoski dhe VMRO-DPMNE e fshehën burimin e parave për huamarrje të reja të mëdha. Më në fund është e qartë pse Mickoski dhe bashkëpunëtorët e tij ishin çdo fundjavë në Budapest për konsultime në azilin e Gruevskit. Bashkëpunimi i veçantë ekonomik me Hungarinë është në drejtim të mbi-borxhit dhe pengmarrjes politike të vendit tonë në një vend tjetër. Pyesim se cili është roli i Gruevskit në këtë marrëveshje? Edhe për fëmijët e vegjël është e qartë se pas një marrëveshjeje të tillë fshihen interesa politike, e cila do të dalë shumë shpejt në dritë”, reagoi pasditen e sotme LSDM opozitare.
Kjo parti pyet “a është i vetëdijshëm Mickoski se është duke nisur një aventurë që mund të rrezikojë seriozisht bashkëpunimin me institucionet financiare ndërkombëtare si Banka Botërore dhe Fondi Monetar Ndërkombëtar?”.
“Pse Mickoski dhe VMRO-DPMNE po e gënjejnë opinionin se kjo është kredia më e favorshme që mund të marrë? Pse të mos themi se shteti është aktualisht përfitues i një kredie prej 150 milionë eurosh nga Banka Evropiane për Zhvillim në kushte më të mira, pra me një normë interesi 1.6% me një periudhë mospagimi 24 muaj dhe një afat shlyerjeje 12 vjet dhe 100 milionë shtesë me 3.5? Kjo kredi është shumë më e favorshme se ajo e Budapestit. Pse, pa asnjë përpjekje tjetër, përmes mekanizmave të kontrolluar të huamarrjes nga organizatat financiare ndërkombëtare, ai dëshiron të marrë kredi privatisht? Pse ai dhe ministrja e Financave Koçovska gënjejnë opinionin se kredia do të jetë me kamatë nën 3%, si arriti ajo në 3.25%? Çfarë fshihet pas rritjes së kamatës?”, pyeti LSDM.
Qëndrimi i partisë është se “Qeveria e re ka detyrim t’i përgjigjet publikut ku mungojnë 500 milionët për 1 miliard eurot e premtuara?”. A mundet që Gruevski t’i mbajë të rezervuar për Mickoskin si garanci se ai nuk do të largohet nga kursi i planifikuar? Qytetarët shumë shpejt ballafaqohen me mashtrimet parazgjedhore të kësaj VMRO-DPMNE-je, e cila dëshmon se “ujku e ndërron gëzofin, por karakterin kurrë”! A është ky çmimi i mbajtjes nën mbrojtjen e Gruevskit? – pyesin socialdemokratët.