Ambasadori i parë amerikan në Shqipëri vendos dy flamuj shqiptarë në shtëpinë e tij në SHBA për 28 Nëntor

Shtëpia e ambasadorit të parë amerikan në Shqipëri, William Ryerson, për 28 Nëntor ishte e zbukuruar me dy flamuj të Shqipërisë.

Një fotografi të shtëpisë së tij e ka publikuar kryeredaktori i një gazete në gjuhën shqipe në SHBA, Ruben Avxhiu.

“Shtëpia e Ambasadorit Bill Ryerson, afër kryeqytetit Washington, e stolisur sot, jo me një, por me dy flamuj shqiptarë, me rastin e 28 Nëntorit. William Ryerson ishte Ambasadori i parë i Shteteve të Bashkuara të Amerikës në Shqipëri pas rrëzimit të komunizmit dhe rivendosjes së marrëdhënieve diplomatike mes dy vendeve tona pas më shumë se 40 vjet ndërprerje”, ka shkruar ai krahas fotografisë.

William Ryerson shërbeu si Ambasador i Jashtëzakonshëm dhe Fuqiplotë i SHBA-së në Shqipëri nga viti 1991 deri në vitin 1994./Express/