Hakeronte kompjuterët e institucioneve shtetërore, hetohet 15-vjeçari autik në Vlorë

Një 15-vjeçar është vënë nën hetim nga Policia e Vlorës, pasi dyshohet se ka hakeruar sistemet kompjuterike të disa institucioneve shtetërore në vend. Sipas policisë, operacioni për arrestimin e tij është koduar “The Accountant”, ndërsa nga hetimi 1-mujor me metoda speciale, është zbardhur rasti dhe identifikuar autori.

“Ky operacion u zhvillua pas një hetimi intensiv njëmujor, të ndjekur me metoda speciale hetimi, në kuadër të goditjes së krimeve kibernetike”, njofton policia.

Si rezultat i hetimeve, u dokumentua veprimtaria e kundërligjshme e shtetasit të mitur 15 vjeç, banues në Vlorë, i cili dyshohet se gjatë muajit mars 2025 ka ndërhyrë në mënyrë të paautorizuar në të dhënat kompjuterike të disa institucioneve shtetërore (email-e dhe faqe zyrtare), duke shkaktuar ndërprerjen e funksionimit të tyre për periudha të caktuara kohore.

Nga hetimet e deritanishme nuk ka rezultuar vjedhje të të dhënave apo dokumenteve konfidenciale nga këto sisteme.

Gjatë operacionit u sekuestruan disa pajisje, të cilat do t’i nënshtrohen ekzaminimeve të thelluara teknike, konkretisht: 5 kompjuterë laptop, 6 aparate celularë dhe 1 dron.

Vijojnë hetimet për dokumentimin e plotë të kësaj veprimtarie.