Kina i përgjigjet tarifave të Trump me taksë shtesë prej 34% për mallrat amerikane

Kina ka thënë se do të shtojë një tarifë prej 34% për mallrat amerikane duke filluar nga 10 prilli.

Ministria e saj e Financave thotë se tarifat e SHBA-së për produktet kineze “nuk janë në përputhje me rregullat e tregtisë ndërkombëtare”.

Presidenti i SHBA Donald Trump ka njoftuar tarifat 54% ndaj Kinës, të cilat përfshijnë detyrimet e mëparshme tashmë të vendosura.

Kjo e bën Kinën një nga vendet më të goditura në listën tarifore të Amerikës.

Po asht, BBC ka raportuar për disa njoftime të tjera nga Kina në momentet e fundit, duke përshkruar kufizime të reja për kompanitë amerikane, transmeton Gazeta Express.

Ndërsa masat e mëparshme ishin një përgjigje e drejtpërdrejtë ndaj tarifave të SHBA-së, Kina thotë se këto hapa të fundit janë të lidhura me shqetësimet e sigurisë kombëtare dhe çështjen e Tajvanit.

Kontrolli i eksportit

Kina thotë se ka shtuar 16 entitete amerikane në listën e saj të “kontrollit të eksportit”, duke pretenduar se ata kanë “sjellje që mund të rrezikojnë sigurinë dhe interesat kombëtare të Kinës”.

Ky veprim ndalon eksportimin e artikujve me përdorim të dyfishtë – mallra, softuer dhe teknologji që mund të përdoren si për qëllime civile ashtu edhe për ato ushtarake – në ato subjekte.

Subjekte jo të besueshme

Pekini thotë gjithashtu se ka vendosur 11 subjekte të huaja në listën e tij të “entiteteve jo të besueshme”, gjë që e lejon atë të ndërmarrë veprime ndëshkuese kundër tyre.

Ministria e Tregtisë thotë se këto kompani janë angazhuar në “të ashtuquajturin bashkëpunim ushtarak dhe teknik me Tajvanin”.

Pezullimi i importit

Kina gjithashtu ka pezulluar kualifikimet e eksportit të gjashtë kompanive amerikane, duke përmendur shqetësimet e sigurisë ushqimore.