Kush ishte Shamsud-Din Jabbar – sulmuesi që vrau 15 persona në New Orleans?

Pesëmbëdhjetë persona u vranë dhe të paktën 35 u plagosën pasi një burrë – me sa duket i frymëzuar nga grupi i Shtetit Islamik – hyri me veturë në turma të mëdha në New Orleans, Luiziana, në orët e para të ditës së Vitit të Ri, kanë thënë autoritetet amerikane. Sulmuesi u vra në një shkëmbim zjarri me policinë.

Kush ishte Shamsud-Din Jabbar?

FBI e ka identifikuar sulmuesin në New Orleans si Shamsud-Din Jabbar, 42 vjeç, një veteran i ushtrisë dhe shtetas amerikan nga Teksasi, shkruan BBC, transmeton Gazeta Express.

Një flamur i lidhur me grupin e Shtetit Islamik (IS) u gjet në automjetin që ai drejtonte dhe FBI tha se po hetonte se çfarë lidhje mund të kishte Jabbar me grupet terroriste.

Në një fjalim në mbrëmje, presidenti Joe Biden tha se FBI e kishte informuar atë për sulmin. I dyshuari ngarkoi video në mediat sociale “vetëm pak orë para sulmit” duke treguar se ai ishte frymëzuar nga IS dhe duke shprehur një “dëshirë për të vrarë”, tha Biden.

Në zonë u gjetën gjithashtu pajisje të dyshuara eksplozive të improvizuara.

U gjet gjithashtu një armë e gjatë me një “pajisje shtypëse” në të – duke vepruar si silenciator.

Sipas një profili të hequr tashmë në LinkedIn, Jabbar kishte punuar në role të ndryshme në ushtrinë amerikane, duke përfshirë burimet njerëzore dhe IT, përpara se të shkarkohej. Ai u vendos në Afganistan nga shkurti 2009 deri në janar 2010.

Në një video në YouTube të postuar në vitin 2020, Jabbar tha se koha e tij në ushtri i kishte mësuar atij “kuptimin e shërbimit të madh dhe çfarë do të thotë të jesh i përgjegjshëm dhe të marrësh gjithçka seriozisht”.

Ai studioi në Universitetin Shtetëror të Gjeorgjisë nga viti 2015 deri në vitin 2017, duke u diplomuar për sistemet e informacionit kompjuterik.

Ai ishte martuar dy herë. Martesa e tij e parë përfundoi në 2012 dhe e dyta zgjati nga 2017 deri në 2022.

Ai rezulton të ketë punuar edhe në pasuri të paluajtshme, me një licencë të skaduar në vitin 2021. Ai kishte precedentë penalë, lidhur me kundërvajtje në trafik dhe vjedhje.

Kamioni që ai drejtonte ishte elektrik dhe besohej se ishte marrë me qira në Teksas nëpërmjet një aplikacioni të quajtur Turo.