Mickoski uron “faljen” ortodokse, teksa harroi të urojë Ramazanin!

Besimtarët ortodoks shënojnë “Faljen”, ditën në vigjilje të nisjes së agjërimit të Pashkëve.

Kjo festë simbolizon faljen midis njerëzve, që t`i lënë mëkatet me privimin nga ushqimi i yndyrshëm, kurse përmes agjërimit të përmbahen edhe nga mëkatet. Këtë festë besimtarëve ortodoks ua ka uruar edhe Kryeministri Mickoski, I cili përmes një postimi në Facebook thotë se kjo ditë na rikujton rëndësinë e faljes, qetësisë shpirtërore dhe afërsisë njerëzore. “Le të jetë kjo ditë nxitje që të afrohemi me njëri-tjetrin, t`i tejkalojmë mosmarrëveshjet dhe ta përforcojmë besimin në unitet.

Vetëm me respekt të ndërsjellë dhe me sinqeritet mund të krijojmë shoqëri më të fuqishme dhe më të drejtë” – thuhet në urimin e Kryeministrit Mickoski. Por, në postimin në Facebook, Mickoski shkruan se “duke shpejtuar gjatë përditshmërisë shpeshherë harrojmë se fuqia e vërtetë qëndron në aftësinë për të treguar mirëkuptim për veprimet e tjerëve dhe të vazhdojmë përpara me zemër të pastër”. E kuptojmë se Kryeministri ka një agjendë të ngjeshur.

Gjithashtu e kuptojmë se gjatë nisjes së Muajit të Shenjtë të Ramazanit ishte në Turqi, por fakt është se besimtarët mysliman u privuan nga urimi i Kryeministrit të tyre për këtë muaj të bekuar e të dalluar.

Nuk dihet nëse bëhet fjalë për standarde të dyfishta, por të urosh publikisht “Proçkën” ortodokse e nga ana tjetër të njëjtën gjë të mos e bësh për Muajin e Shenjtë të Ramazanit kundrejt një popullate të tërë myslimane që jeton në Maqedoninë e Veriut, më pak që mund të thuhet, paraqet mospërfilje ndaj kësaj popullate, që fatmirësisht në festat fetare ka ditur të bashkohet e të dëshmojë vlera tolerance e mirëkuptimi pa marrë parasysh përkatësinë etnike e fetare. Le ta përmbyllim këtë tekst me shkrimin në fund të postimit në Facebook të Kryeministrit Mickoski në urimin drejtuar besimtarëve ortokoks.

“Këto gjeste të thella nuk janë vetëm zakone, por një mesazh i fuqishëm se askush nuk është i pagabueshëm dhe se secili ka mundësi të tregojë mirësi në vend të zemërimit” – shkruan Kryeministri. Po, askush nuk është I pagabueshëm. Madje as edhe Kryeministri! Fitër Bajrami është shumë afër mbase në këtë festë fetare do të reflektojë! /tvklan.mk/