Putin e uron Trumpin: Mirëpres angazhimin për ta parandaluar një luftë të tretë botërore

Presidenti rus Vladimir Putin është shprehur i hapur për rindërtimin e marrëdhënieve me administratën e re amerikane, vetëm disa orë përpara inaugurimit të presidentit të sapozgjedhur Donald Trump.

Në një takim televiziv të Këshillit të Sigurimit Rus të hënën, Putin tha se i mirëpret deklaratat e Trump dhe ekipit të tij që “shprehin dëshirën për ta rivendosur kontaktin e drejtpërdrejtë me Rusinë” dhe “nevojen për të bërë gjithçka për ta parandaluar një luftë të tretë botërore”, duke theksuar gatishmërinë e Moskës për t’u angazhuar në dialog, raporton CNN.

“Ne sigurisht e mirëpresim këtë qasje dhe përgëzojmë presidentin e zgjedhur të Shteteve të Bashkuara të Amerikës për marrjen e detyrës”, tha ai. “Theksoj: ne kurrë nuk e kemi refuzuar dialogun, kemi qenë gjithmonë të gatshëm të mbajmë marrëdhënie të qetë bashkëpunimi me çdo administratë amerikane”, shtoi Putin.

“Ne vijojmë nga fakti se dialogu do të ndërtohet mbi baza të barabarta dhe me respekt reciprok, duke marrë parasysh rolin e rëndësishëm që vendet tona luajnë në një sërë çështjesh kyçe në agjendën globale, duke përfshirë forcimin e stabilitetit dhe sigurisë strategjike”.

Putin shfrytëzoi rastin për ta ritheksuar qëndrimin e Rusisë për një zgjidhje të mundshme në Ukrainë.

“Ne jemi gjithashtu të hapur për dialog me administratën e re të SHBA-së për konfliktin ukrainas”, tha ai, duke theksuar rëndësinë e arritjes së paqes afatgjatë dhe duke përmendur angazhimin e Rusisë për të mbrojtur interesat e saj.