Raportohet se Nisma do t’ia bëjë numrat Kurtit, reagon anëtari i AAK-së

Nisma Socialdemokrate “do ta votojë qeverinë e propozuar nga Lëvizja Vetëvendosje”, bazuar në një raportim të portalit Nacionale.

Nacionale, duke u thirrur në një burim, të dielën në mbrëmje raportoi se tre deputetë të Nismës “do t’ia votojnë qeverinë” Kurtit, por “pa hyrë në qeveri”.

Informacioni nuk është konfirmuar ende.

Kryetari i Nismës Socialdemokrate, Fatmir Limaj dhe anëtarët e kryesisë Vesel Krasniqi e Endrit Shala nuk janë përgjigjur në telefon, të kontaktuar nga Paparaci për të marrë një koment lidhur me veprimet e partisë për koalicionet paszgjedhore.

Ndërsa, për këtë raportim ka reaguar Haki Abazi, anëtar i Aleancës për Ardhmërinë e Kosovës, partnerit parazgjedhor të Nismës Socialdemokrate. AAK-ja dhe Nisma garuan në një listë zgjedhore më 9 shkurt.

Abazi tha të dielën në mbrëmje se çdo favor i subjekteve opozitare në drejtim të Lëvizjes Vetëvendosjes për krijimin e qeverisë, do “t’ia mundësonte Kurtit realizimin e marrëveshjes sekrete për qeveri me Listën Serbe”.

Ish-deputeti i Lëvizjes Vetëvendosje, tash një nga kritikët më të ashpër të Kurtit, tha në një shkrim në Facebook se Vetëvendosje synon që t’i kompensojë dhjetë mandate të humbura në kuvend me deputetët e Listës Serbe.

“Gërshërët e Kurtit kanë shkurtuar LVV për 10 deputet që tani duhet t’i kompensoj me deputetët e LS. ZDRAVO është gjallë sepse majtistët jugosllav janë gjallë!”, tha ai dhe vazhdoi duke e përmend liderin e Nismës: “Apo Fatmir Limaj?”.

Nisma Socialdemokrate i siguroi tri nga tetë mandatet e fituara nga koalicioni AAK-Nisma në zgjedhjet parlamentare të 9 shkurtit. Fatmir Limaj, në paraqitjen e parë publike pas zgjedhjeve, tha se është gati të bashkëpunojë me kryeministrin në detyrë Albin Kurti për formimin e institucioneve.

Gatishmëria e tij për bashkëpunim me Kurtin ngjalli reagime të ashpra nga kampi opozitar i cili synon që të krijojë një bllok kundër pushtetit të deritashëm për formimin e qeverisë së re. /Paparaci.com