Sekretari i Përgjithshëm i NATO-s, Mark Rutte do të vizitojë të hënën Turqinë

Sekretari i Përgjithshëm i NATO-s Mark Rutte do të udhëtojë në Ankara të hënën për bisedime të nivelit të lartë me përfaqësuesit turq, njoftoi aleanca të premten, siç raportohet nga agjencia shtetërore e lajmeve Anadolu.

Rutte do të takohet me presidentin turk Recep Tayyip Erdogan, ministrin e Jashtëm Hakan Fidan dhe ministrin e Mbrojtjes Yaşar Güler.

Vizita do të përfshijë gjithashtu bisedime me përfaqësues të industrisë turke të mbrojtjes dhe një turne në objektet e Industrisë Turke të Hapësirës Ajrore.

Kjo është vizita e parë zyrtare e Rutte në Ankara që nga marrja e detyrës si shefi i NATO-s.

Para vizitës së tij në Turqi, Mark Rutte u takua të premten në Florida me presidentin e zgjedhur të SHBA-së, ndërsa ndalesa e radhës e sekretarit të përgjithshëm do të jetë Athina.