Temperaturat gjatë gjithë javës do të jenë rreth 40 gradë, ISHP apel për kujdes

Muaji korrik ka sjellë me vete edhe temperatura të larta që për disa ditë do të shkojnë deri në 40 Gradë Celsius. Javën e dytë të korrikut pritet ta kaploj vala e të nxehtit, ndërsa në vendet malore sipas Institutit për Punë Hidrometeorologjike mund të ketë reshje shiu.

Instituti për Punë Hidrometeorologjike

“Vijon mot shumë i nxehtë me temperature ditore e cila gjithëandej do të jetë mbi 30 Gradë Celsius, në disa vende do të arrij deri në 40°C. Orët e pasdites posaçërisht në vendet malore do të ketë paraqitje të motit jostabil me reshje shiu, sidomos nesër dhe të mërkurën kur do të ketë përkeqësim afatshkurt të motit”.

Nga Instituti i Shëndetit Publik bëjnë apel për kujdes pasi thonë se vala e të nxehtit që pritet të dominojë ditëve në vijim mund të ndikojnë negativisht në shëndetin dhe mirëqenien e qytetarëve dhe sidomos të grupeve të cenueshme. “Periudhat e zgjatura me temperatura të larta gjatë ditës dhe natës krijojnë stres të grumbulluar në trupin e njeriut dhe rrisin rrezikun e sëmundjes dhe vdekjes nga ekspozimi ndaj nxehtësisë”, shtojnë nga Instituti.