Verstappen e fiton titullin e katërt në F1

Piloti holandez i Red Bullit, Max Verstappen e ka fituar titullin e katërt të kampionit në Formula 1.

Verstappen siguroi titullin me vendin e pestë që e zuri në garën e Shpërblimit të Madh të Las Vegasit të shtunë mbrëma.
Verstappenit i duhej ta mbante prapa vetes vetëm Lando Norrisin e McLarenit dhe atë e bëri.
Verstappen, dy gara pa përfunduar stinori i ka 403 pikë, 63 më tepër se Norrisi.

“Ka qenë stinor i gjatë, nisëm për mrekulli dhe po shkonim mirë, por më pas patëm telashe… Kemi punuar në përmirësime dhe jam shumë krenar për punën që është bërë. Unë kurrë s’kam menduar se do t’i fitoj katër tituj të Formula 1. Po ndihem i relakuar, por edhe shumë krenar”, ka thënë Vestappen.

Garën në Las Vegas e fitoi George Russell i Mercedesit. Ai përfundoi para kolegut të tij të Mercedesit, Leëis Hamilton. Pozitat tre e katërt i zunë pilotët e Ferrarit, Carlos Sainz e Charles Leclerc.
Verstappen doli i pesti, e Lando Norris i gjashti.

Në renditjen e konstruktorëve kryeson McLaren-Mercedesi me 608 pikë, Ferrari është i dyti me 584, ndërsa Red Bull Racing Honda i treti me 555 pikë.