Vrasësi masiv Andreas Breivik kërkon sërish lirim të parakohshëm nga burgu

Vrasësi masiv norvegjez Anders Behring Breivik do të dalë sot në gjykatë për të kërkuar lirimin e parakohshëm pasi kaloi më shumë se 13 vjet në burg.

Neo-nazisti anti-musliman vrau 77 persona në korrik 2011. Ai vrau tetë duke shpërthyer një makinë bombë në Oslo, pastaj 69 të tjerë, kryesisht adoleshentë, në një kamp të të rinjve të Partisë Laburiste në ishullin Utoja.

Kjo do të jetë tentativa e dytë e lirimit me kusht për Breivik, i cili po vuan një dënim maksimal prej 21 vitesh, i cili mund të zgjatet për aq kohë sa ai konsiderohet një kërcënim për shoqërinë.

Breivik kishte të drejtë të aplikonte për lirim me kusht pasi kreu dhjetë vitet e para të dënimit të tij me burg.

Përpjekja e tij e parë për lirim, në vitin 2022, ishte e pasuksesshme. Në atë seancë, Breivik pretendoi se kishte lënë pas dhunën, por nuk hoqi dorë nga simpatitë e tij neo-naziste, duke thënë vetëm se ai do të vazhdonte luftën e tij për supremacinë e bardhë përmes mjeteve paqësore.

Kërkesa e fundit për lirim me kusht do të dëgjohet në burgun e sigurisë maksimale ku ai po mbahet, që ndodhet buzë liqenit të Tirifjordenit. Gjykata do të jetë e vendosur në sallën sportive të burgut. Breivik do të dëshmojë nga ora 13:00 me kohën lokale.

Përveç kësaj, Breivik u përpoq të padiste shtetin norvegjez, duke pretenduar se mbajtja në izolim cenonte të drejtat e tij njerëzore.

Përpjekja e tij e fundit për të ndryshuar kushtet e paraburgimit u refuzua në janar të vitit të kaluar. Apeli i Breivik do të shqyrtohet në dhjetor.