Vrasja në Kaçanik, Çitaku kritikon Qeverinë: Shteti po dështon para syve tanë çdo ditë

Sekretarja e Përgjithshme e PDK-së, Vlora Çitaku, ka reaguar pas vrasjes se policit në Kaçanik.

Ai është shprehur e shqetësuar me shtimin e vrasjeve në Kosovë, duke kritikuar Qeverinë e Kosovës.

Në profilin e saj në “Facebook”, Çitaku ka shkruar se institucionet janë të heshtura, kurse qeveria është e paralizuar.

“Çdo mëngjes po zgjohemi me lajme tronditëse: dhunë, krim, vrasje. Jetët e qytetarëve tanë po shuhen një nga një, në rrugë, në shtëpi, në vendin e punës, dhe askush nuk po mban përgjegjësi. Mbrëmë, në një akt që trondit thellë ndërgjegjen e çdo qytetari, një pjesëtar i Policisë së Kosovës u vra në hyrje të shtëpisë së tij. Një njeri i uniformës, simbol i rendit dhe sigurisë, u bë viktimë në vendin që duhej ta kishte më të shenjtë: në prag të shtëpisë së tij. Kjo nuk është më thjesht mungesë rendi, kjo është alarm kombëtar. Institucionet janë të heshtura. Qeveria është e paralizuar. Krimi është i lirë, qytetari është i pambrojtur. Shteti po dështon para syve tanë çdo ditë, çdo orë”, ka shkruar Çitaku.