By admin 
Edhe pse autoritetet e kanë promovuar sistemin “Qyteti i Sigurt” si një nga mjetet kryesore për rritjen e sigurisë në komunikacion, rezultatet e para tregojnë se ndikimi i tij në uljen e numrit të viktimave në aksidentet rrugore mbetet i kufizuar, përcjell Faktiditor.info.
Sipas një analize të publikuar nga BIRN, vetëm pak muaj pas nisjes zyrtare të projektit, në Shkup nuk është vërejtur një rënie e ndjeshme e numrit të personave që humbin jetën në aksidente trafiku. Ndërkohë, qytetarët në disa zona të kryeqytetit vazhdojnë të përballen me probleme të sigurisë rrugore.
Banorët e lagjes Butel kanë protestuar pas një aksidenti ku u godit një fëmijë, duke kërkuar më shumë prani të policisë dhe masa konkrete kundër vozitjes së pakontrolluar. Ata theksojnë se në pjesën e rrugës ku jetojnë nuk ka kamera të sistemit “Qyteti i Sigurt”, gjë që sipas tyre u mundëson shoferëve të lëvizin me shpejtësi të lartë pa frikën e ndëshkimit.
Përveç sfidave në terren, sistemi po përballet edhe me probleme teknike. Gjykata e Shkupit është përballur me një numër të madh ankesash lidhur me gjobat e shqiptuara nga kamerat, përfshirë raste kur njoftimet kanë shkuar edhe te automjete që sipas ligjit gëzojnë status të veçantë dhe duhet të përjashtohen nga ndëshkimi.
Eksperti i komunikacionit dhe njohësi i çështjeve ligjore, Dejan Trpevski, vlerëson se teknologjia mund të ndihmojë në kontrollin e trafikut, por nuk mund të zëvendësojë plotësisht praninë e policisë në terren.
“Kamerat janë vetëm një mjet shtesë. Nuk mund të mbështetemi vetëm te ‘Qyteti i Sigurt’, sepse shumë shkelje dhe vepra të tjera kërkojnë prezencë fizike të policisë”, ka deklaruar ai.
Ndërkohë, statistikat tregojnë se Maqedonia e Veriut vazhdon të ketë një shkallë më të lartë të viktimave në komunikacion krahasuar me mesataren e Bashkimit Evropian, duke e bërë sigurinë rrugore një nga sfidat kryesore për institucionet e vendit, përcjell Faktiditor.info.
Kumanova në qendër të vëmendjes, Ahmeti shpall mobilizim për sfidat e ardhshme
admin7