By Asije Sulejmani 
Aktorja e njohur e Hollywood-it, Cameron Diaz, dhe bashkëshorti i saj, muzikanti Benji Madden, kanë surprizuar publikun me lajmin për ardhjen në jetë të fëmijës së tyre të tretë.
Njoftimi u bë publik këtë të hënë përmes një postimi në Instagram nga anëtari i grupit “Good Charlotte”, i cili ndau emocionet e familjes në këtë moment të veçantë.
Në mesazhin e tij, Madden shprehu gëzim dhe mirënjohje, duke treguar se ai dhe Cameron ndihen “të lumtur, të emocionuar dhe të bekuar” për lindjen e djalit të tyre, të cilin e kanë quajtur Nautas Madden. Ai nuk publikoi fotografi të të porsalindurit, por ndau një imazh simbolik të një anijeje, duke shpjeguar edhe kuptimin e emrit: “detar, udhëtar, lundrues – dikush që nis një rrugëtim pa frikë nga e panjohura”.
Çifti, i martuar që nga viti 2015, tashmë është prind i tre fëmijëve. Vajza e tyre Raddix erdhi në jetë në vitin 2019, ndërsa djali Cardinal u lind në mars të vitit 2024. Të dy janë të njohur për mënyrën e tyre diskrete të jetesës, duke zgjedhur ta mbajnë familjen larg vëmendjes së tepërt të mediave.
Ky zhvillim i ri vjen në një periudhë kur Cameron Diaz po rikthehet gradualisht në botën e kinemasë, pas një pauze të gjatë për t’iu përkushtuar jetës familjare. Ajo po merr pjesë në filmin komedi “Outcome”, ku luan përkrah Keanu Reeves, duke treguar se po arrin të balancojë me sukses karrierën dhe jetën personale.