Kanton Zug shtrëngon rregullat: edhe femit shqiptar 3-vjeçar do t’i nënshtrohen testit të gjuhës?!

Kantoni i Zugut po ndryshon mënyrën se si vlerësohen dhe mbështeten fëmijët në sistemin shkollor. Në qendër të reformës është performanca, testimi dhe përgatitja sa më e hershme e fëmijëve për shkollë.

Një nga masat më të debatueshme prek fëmijët vetëm trevjeçarë. Të gjithë fëmijët do t’i nënshtrohen një vlerësimi të aftësive gjuhësore. Ata që nuk arrijnë nivelin minimal të përcaktuar do të duhet të ndjekin çerdhe ose grup lojërash dy gjysmë dite në javë.

Drejtori i Arsimit i Zugut, Stephan Schleiss, thotë se masat synojnë të përmirësojnë aftësitë gjuhësore dhe socializimin e fëmijëve, ndërsa sipas tij këto aftësi janë përkeqësuar vitet e fundit.

Nga klasa e katërt, teste standarde.

Reforma nuk ndalet te fëmijët e vegjël. Duke filluar nga klasa e katërt, nxënësit do t’u nënshtrohen testeve të standardizuara në gjermanisht dhe matematikë.

Qëllimi është që rezultatet të mund të krahasohen mes komunave, shkollave dhe klasave të ndryshme.

Por ekziston edhe frika se mësuesit mund të fillojnë të përgatisin nxënësit kryesisht për testet. Për këtë arsye, zbatimi i sistemit po zhvillohet në bashkëpunim me përfaqësuesit e mësuesve.

Rikthehen notat tradicionale

Në Zug, simbolet, buzëqeshjet dhe kodet me ngjyra nuk do të mund të zëvendësojnë më plotësisht notat tradicionale. Ato mund të përdoren në klasat e ulëta, por duhet të jenë të lidhura qartë me një vlerësim.

Schleiss argumenton se notat duhet të pasqyrojnë performancën e fëmijës dhe atë që ai ose ajo është në gjendje të bëjë.

“Ishuj shkollorë” për fëmijët me probleme

Një tjetër masë është krijimi i të ashtuquajturve “ishuj shkollorë”. Fëmijët me probleme të sjelljes do të mund të largohen përkohësisht nga klasa dhe të marrin mbështetje në një ambient të veçantë.

Schleiss e konsideron këtë një mënyrë pedagogjikisht të dobishme për të menaxhuar situatat kur një fëmijë nuk mund të vazhdojë normalisht mësimin në klasë.

Ndërkohë, po shqyrtohet edhe mundësia që akomodimet speciale për nxënësit të shënohen në dëftesa, gjë që ka shkaktuar kritika nga juristët e shkollave për shkak të rrezikut të stigmatizimit.

Reforma e Zugut po hap kështu një debat të madh: a është kjo mënyra e duhur për të përmirësuar arsimin, apo po vendoset shumë presion mbi fëmijët që në moshë shumë të hershme?

Schleiss e kundërshton kritikën dhe thotë se një shkollë që fokusohet vetëm te “përkëdhelja” nuk i ndihmon askujt.

Alarm në Zvicër: Krimi rritet, kantonet kërkojnë qindra policë të rinj – por nga do të vijnë ata?