Shqipëria ka njoftuar ndryshime në përfaqësinë e saj diplomatike në Maqedoninë e Veriut, ku ambasadori Denion Mejdani do të largohet nga Shkupi. Në parim, rotacionet diplomatike janë pjesë normale e marrëdhënieve ndërkombëtare. Por rasti i Mejdanit ka një dimension më të gjerë politik, për shkak të profilit të tij dhe angazhimit të dukshëm gjatë mandatit.
Mejdani ishte një nga ambasadorët shqiptarë më aktivë në Shkup në çështjet që lidhen me pozitën dhe problematikat e shqiptarëve në Maqedoninë e Veriut. Pikërisht kjo qasje e bëri atë një figurë të ekspozuar në debatin politik dhe publik. Përkrahësit e panë si një diplomat që e kishte rritur ndjeshëm vëmendjen e Tiranës ndaj çështjeve shqiptare, ndërsa kritikët e akuzuan për tejkalim të rolit diplomatik dhe për afërsi me struktura të caktuara politike, shkruan FaktiDitor.info
Gjatë mandatit të tij u përfolën edhe pretendime për reagime të Shkupit zyrtar, madje edhe për një notë verbale, si dhe për lobime të figurave politike në Maqedoninë e Veriut pranë Tiranës për ta kufizuar aktivitetin e tij. Këto pretendime nuk janë të mjaftueshme për të nxjerrë përfundime, por e bëjnë largimin e tij politikisht më interesant, shkruan FaktiDitor.info
Pyetja që shtrohet tashmë është: A kemi të bëjmë vetëm me një rotacion të zakonshëm diplomatik, apo largimi i Mejdanit mund të jetë edhe rezultat i një kalkulimi politik?
Nëse ekzistojnë presione politike apo ndërkombëtare, atëherë largimi i tij mund të interpretohet si një përpjekje për të rikthyer një diplomaci më të rezervuar të Tiranës ndaj zhvillimeve të brendshme të Maqedonisë së Veriut. Nëse jo, atëherë bëhet fjalë thjesht për një ndryshim diplomatik të zakonshëm.
Por testi i vërtetë do të jetë ambasadori i ri.
A do të vazhdojë Tirana me një diplomaci aktive ndaj çështjeve që prekin shqiptarët në Maqedoninë e Veriut, apo do të rikthehet në një qasje më të heshtur dhe më tradicionale?
Kjo do të jetë më shumë se një çështje diplomatike. Do të jetë një tregues i mënyrës se si Tirana e sheh rolin e saj politik ndaj shqiptarëve dhe ndaj zhvillimeve në Maqedoninë e Veriut/ FaktiDitor.info
admin 
admin7