Ministri izraelit: I gjithë Libani të digjet, për çdo lot të derdhur të një nëne izraelite, një mijë nëna libaneze duhet të qajnë

Ministri izraelit i Sigurisë Kombëtare, Itamar Ben Gvir, deklaroi se “i gjithë Libani duhet të digjet” pasi një mjet shpërthyes i Hezbollahut vrau katër ushtarë izraelitë në territorin libanez gjatë natës të së premtes.

“Për çdo lot të derdhur nga një nënë izraelite, një mijë nëna libaneze duhet të qajnë”, shkroi Ben Gvir në platformën X. “I gjithë Libani duhet të digjet”.

Ben Gvir ka kërkuar vazhdimisht sulme më intensive izraelite në Liban, përfshirë goditje ndaj kryeqytetit Beirut, edhe pse presidenti Donald Trump ka ushtruar presion ndaj Izraelit për të kufizuar sulmet.

“Me gjithë respektin për amerikanët, Izraeli duhet t’ia bëjë të qartë gjithë botës se gjaku i bijve tanë dhe siguria e qytetarëve tanë nuk janë për t’u sakrifikuar”, tha Ben Gvir.

Ministri i Financave nga krahu i ekstremit të djathtë, Bezalel Smotrich, i cili e përshkroi situatën si një “mëngjes të vështirë”, gjithashtu bëri thirrje për sulme ndëshkuese në Liban.

“Ka ardhur koha të flasim me zjarr”, shkroi ai në X. “Të hapim portat e ferrit”.

Forcat izraelite vazhdojnë të kontrollojnë një zonë të gjerë në jug të Libanit. Kryeministri Benjamin Netanyahu ka bërë të qartë se nuk ka ndërmend të tërhiqet nga ajo zonë.