Përplas me makinë turmën, dy persona vdesin dhe disa plagosën në Leipzigut të Gjermanisë

Të paktën dy persona janë vrarë dhe disa të tjerë janë plagosur pasi një shofer me një SUV u përplas me një turmë njerëzish në qendër të Leipzigut në Gjermaninë lindore, tha kryebashkiaku i qytetit.

“Policia ka arrestuar sulmuesin e dyshuar”, tha Burkhard Jung të hënën, duke shtuar se autoritetet e kishin nën kontroll vendin e ngjarjes në një zonë për këmbësorë. “Ende nuk e dimë me të vërtetë motivin. Nuk dimë asgjë për autorin e krimit”.

Jung tha se i dyshuari, për të cilin autoritetet kanë konfirmuar se është një 33-vjeçar i lindur në Gjermani, banor i zonës së Leipzigut, është arrestuar, shkruan The Guardian.

Punonjësit e shërbimeve të emergjencës thanë se rreth dy duzina persona u plagosën në incidentin, i cili ndodhi rreth orës 16:45. Zona kishte qenë plot me blerës dhe klientë të kafeneve në një pasdite të ngrohtë pranvere, transmeton Sinjali.

“Dy persona u plagosën rëndë. Ata u trajtuan menjëherë nga ekipet e ndihmës së shpejtë dhe më pas u morën nën kujdesin e shërbimit të ambulancës dhe u transportuan në urgjencë”, tha shefi i zjarrfikësve Axel Schuh. “Kemi edhe 20 persona të tjerë të prekur”.

Rreth 40 zjarrfikës dhe 40 ndihmës mjekësorë ishin në vendngjarje, si dhe dy helikopterë.

Shoferi besohet se është kthyer nga Sheshi Augustus me një Volkswagen Taigo gri në zonën tregtare të Rrugës Grimmaische me shpejtësi të lartë dhe ka vazhduar rreth 500 metra drejt Sheshit Naschmarkt. Fotografitë treguan xhamin e përparmë të automjetit të thyer dhe kapakun e motorit të dëmtuar.

Dëshmitarët thanë se makina dukej sikur ishte ndaluar nga një nga shtyllat e tërheqshme që mbronin zonën.

Jung, i cili mbërriti në vendngjarje menjëherë pas incidentit, u kërkoi kalimtarëve të shkonin në shtëpi.

“Është tronditëse. E tëra çfarë mund të bëj tani është të shpreh solidaritetin tim me familjet e viktimave”, tha ai për Leipziger Volkszeitung. “Çdo gjë tjetër tani do të varet nga puna e policisë dhe autoriteteve hetuese”.

Jörg dhe Jana Häfner i thanë gazetës se ishin ulur në një restorant kur fuoristrada u ngjit me shpejtësi në rrugë.

“Pati një zhurmë të fortë motori – dhe një shpërthim”, tha Jörg, i cili raportoi se klientët nxituan të ndihmonin një grua që u godit nga makina. “Pati një ndjenjë të jashtëzakonshme solidariteti”, tha Jana, e cila është infermiere.

Dyqanet në zonë u urdhëruan të mbylleshin dhe trupa të mbuluar me çarçafë u panë në trotuar. Policia ngriti një kordon për të penguar kalimtarët.

Lutjet tradicionale të së hënës për paqe në kishën e Shën Nikollës, një vatër e aktivizmit anti-regjim në Gjermaninë Lindore komuniste, u eklipsuan nga incidenti.

Drejtori i kishës, Sebastian Feydt, tha se shumë njerëz që kishin qenë aty pranë u mblodhën për të kërkuar strehim ose për të përkujtuar përvojën e tyre. Ai tha se kisha do të mbetet e hapur për vizitorët deri në njoftim të mëtejshëm.

Gjermania ka pasur një sërë incidentesh me përplasje makinash vitet e fundit.

Vitin e kaluar, dy persona u vranë në qytetin perëndimor të Mannheimit, kur një 40-vjeçar gjerman përplasi makinën drejt një grupi këmbësorësh, vetëm disa javë pas një sulmi të ngjashëm nga një azilkërkues afgan në një demonstratë sindikale në Mynih, duke vrarë dy persona dhe duke plagosur më shumë se 40 të tjerë, përfshirë disa fëmijë.

Në dhjetor të vitit 2024, disa persona u vranë në një sulm me makinë nga një mjek saudit në një treg Krishtlindjesh në qytetin lindor të Magdeburgut. Ky incident ndodhi disa muaj pas një sulmi me thikë nga një burrë sirian në një festival në qytetin perëndimor të Solingen