By admin7 
Isuf B.Bajrami
Me dhimbje, zemërim dhe indinjatë të thellë morëm lajmin për përdhosjen dhe dëmtimin e shkronjave të UÇK-së te Guri i Shpuar. Ky nuk është vetëm një akt vandalizmi — është një goditje ndaj kujtesës sonë kombëtare, ndaj gjakut të dëshmorëve dhe ndaj sakrificës së mijëra bijve e bijave që dhanë gjithçka për lirinë e Kosovës.
Të prekësh simbolet e UÇK-së do të thotë të tentosh të njollosësh historinë tonë të lavdishme. Këto simbole nuk janë thjesht shkronja prej materiali — ato janë amaneti i dëshmorëve, krenaria e popullit dhe dëshmi e sakrificës që solli lirinë që e gëzojmë sot.
Dënojmë me ashpërsinë më të madhe këtë akt të ulët e barbar dhe kërkojmë nga Policia e Kosovës dhe organet e drejtësisë që autorët të identifikohen dhe të marrin dënimin e merituar sipas ligjeve të Republikës së Kosovës. Heshtja ndaj akteve të tilla do të ishte fyerje për historinë dhe për çdo familje që dha më të shtrenjtin për këtë vend.
Kushdo që mendon se mund të djegë, dëmtojë apo përdhosë simbolet tona kombëtare duhet ta dijë se nuk mund të djegë idealin për liri. Historia e UÇK-së është e shkruar me gjakun e dëshmorëve dhe nuk shuhet nga veprimet e errëta të individëve pa identitet e pa ndërgjegje kombëtare.
Sot më shumë se kurrë kërkohet unitet, reagim qytetar dhe mbrojtje e vlerave tona kombëtare. Ne nuk do të heshtim përballë përdhosjes së sakrificës sonë historike.
Njëkohësisht, u bëjmë thirrje qytetarëve që të ruajnë qetësinë dhe të kontribuojnë në mbrojtjen e vlerave tona kombëtare përmes reagimit qytetar, institucional dhe ligjor.
Kërkojmë:
* Zbardhjen sa më të shpejtë të rastit;
* Identifikimin dhe ndëshkimin e përgjegjësve;
* Restaurimin e menjëhershëm të simbolit të dëmtuar;
* Rritjen e kujdesit institucional ndaj monumenteve dhe simboleve përkujtimore.
Lavdi të rënëve për liri dhe respekt për vlerat e luftës çlirimtare.
Lavdi e përjetshme dëshmorëve të kombit!
Nder dhe respekt për luftën çlirimtare të UÇK!
Vendi i Lekës,17.05.2026