By admin5 
Një fond privat investimesh me vlerë 300 miliardë dollarë pritet të jetë një nga shtyllat kryesore të marrëveshjes së re mes Uashingtonit dhe Teheranit, që do të shërbejë për rindërtimin e Iranit.
Sipas Reuters, më shumë se gjysma e kësaj shume është angazhuar tashmë nga kompani private ndërkombëtare dhe do të quhet “Fondi për Rindërtim dhe Zhvillim.”
Investimet e planifikuara përfshijnë sektorët e energjisë, transportit, logjistikës dhe industrisë prodhuese. Burime të përfshira në negociata bëjnë të ditur se kompani nga Shtetet e Bashkuara, vendet e Gjirit Persik, Azia, Amerika e Jugut dhe Afrika kanë shprehur gatishmërinë për të kontribuar financiarisht.
Krijimi i fondit lidhet drejtpërdrejtë me zbatimin e marrëveshjes së arritur mes Uashingtonit dhe Teheranit. Dokumenti paraprak, që pritet të nënshkruhet këte të premte, parashikon një periudhë 60-ditore negociatash për çështjet bërthamore, heqjen e sanksioneve dhe sigurinë rajonale.
Sipas burimeve iraniane, Teherani kishte kërkuar fillimisht 400 miliardë dollarë si kompensim për dëmet e luftës, por administrata amerikane refuzoi një skemë të tillë dhe në vend të saj u propozua krijimi i fondit të investimeve.
Ndërkohë, Presidenti amerikan Donald Trump ka deklaruar se është i gatshëm ta paraqesë marrëveshjen e armëpushimit me Iranin për shqyrtim në Kongres, pasi ligjvënesit kërkojnë më shumë transparencë mbi përmbajtjen e saj.
Demokratët duken skeptikë në lidhje me paktin e paqes, pasi sipas tyre deklarata të tilla janë dëgjuar shumë herë nga shefi i Shtëpisë së Bardhë.
Megjithatë, detajet mbeten të paqarta, pasi teksti i paktit nuk është publikuar dhe as dërguar në Kongres.