By admin 
Një lojë online e publikuar nga Egerkingen Committee ka shkaktuar reagime të ashpra në Zvicer, pasi u akuzua për përmbajtje raciste dhe anti-islame. Pas protestave dhe presionit publik, platforma e hostimit e hoqi lojën nga interneti.
Loja ishte pjesë e një fushate prej 10 milionë frangash dhe synonte të bindte votuesit zviceranë të mbështesnin iniciativën e komitetit. Në lojë, përdoruesit merrnin rolin e një roje kufitare që duhej të “mbronte Zvicrën nga islamizimi zvarritës”.
Kjo përmbajtje nxiti kritika të forta nga organizata dhe aktivistë kundër racizmit. Operation Libero e cilësoi lojën si “ksenofobike dhe raciste”, ndërsa organizata Campax nisi një fushatë për heqjen e saj nga platforma online.
Ndërkohë, edhe Komisioni Federal Kundër Racizmit në Zvicër ndërhyri, duke vlerësuar se mesazhet e shpërndara në lojë mund të konsiderohen raciste dhe potencialisht të dënueshme.
Sipas raportimeve, kompania e hostimit Netlify e çaktivizoi faqen, duke bërë që loja të mos ishte më e qasshme për publikun.
Drejtori i komitetit, Anian Liebrand, konfirmoi mbylljen e lojës dhe tha se janë duke punuar për rikthimin e saj online, duke pretenduar se loja kishte pasur interesim të madh nga përdoruesit.