By admin7 
Komandanti i Forcës së Sigurisë së Kosovës, gjeneral Bashkim Jashari, ka marrë pjesë në ceremoninë e ndërrimit të Komandantit të Ushtrisë Amerikane për Europë dhe Afrikë (USAREUR-AF), Christopher T. Donahue.
FSK në një njoftim tha se Jashari shkoi atje me ftesë të Komandantit Suprem të Forcave Aleate në Evropë (SACEUR) dhe Komandant i Komandës Evropiane të Shteteve të Bashkuara (EUCOM), Alexus G. Grynkeëich.
Gjatë takimit, Jashari shprehu vlerësimin e tij të lartë për lidershipin e gjeneralit Donahue në drejtimin e kësaj komande me rëndësi strategjike për Evropën, duke e falënderuar njëherësh për mbështetjen e vazhdueshme që ka ofruar në zhvillimin dhe ngritjen e kapaciteteve të Forcës së Sigurisë së Kosovës, si dhe për kontributin e tij në avancimin e bashkëpunimit ndërmjet forcave të të dyja vendeve.
“Në anën tjetër, gjeneral Donahue e falënderoi gjeneral Jasharin për pjesëmarrjen në ceremoni dhe për bashkëpunimin e ngushtë dhe të suksesshëm gjatë kësaj periudhe, me theks të veçantë në zgjerimin e aktiviteteve të përbashkëta, përfshirë trajnimet dhe ushtrimet e realizuara, të cilat kanë kontribuar në forcimin e ndërveprueshmërisë dhe partneritetit ndërmjet dy forcave”.
Gjatë ceremonisë, Jashari takoi edhe homologë të vendeve partnere të NATO-s, pjesëmarrës në këtë ceremoni.
“Gjithashtu, takoi edhe zëvendëskomandantin dhe ushtruesin e detyrës së Komandantit të USAREUR-AF Gjeneralmajor Christopher Norrie, me të cilin u dakorduan për vazhdimin e bashkëpunimit dhe aktiviteteve të përbashkëta. Në përmbyllje të ceremonisë, palët rikonfirmuan përkushtimin e përbashkët për avancimin e bashkëpunimit ndërmjet FSK-së dhe Komandës së USAREUR-AF), duke vlerësuar se partneriteti i qëndrueshëm strategjik, avancimi i bashkëpunimit dhe zhvillimi i mëtejmë i kapaciteteve mbrojtëse të forcës janë thelbësore për forcimin e sigurisë, ruajtjen e stabilitetit dhe promovimin e paqes së qëndrueshme në Kosovë dhe më gjerë”, thuhet në njoftimin e FSK’së.