By admin 
Ministria e Drejtësisë e Maqedonisë së Veriut prezantoi sot Raportin Vjetor për Zbatimin e Strategjisë së Zhvillimit të Sektorit të Drejtësisë 2024–2028 për vitin 2025, duke vlerësuar progres të konsiderueshëm në realizimin e reformave në sistemin e drejtësisë.
Ministri i Drejtësisë, Igor Filkov, theksoi se rezultatet dëshmojnë për një ritëm të qëndrueshëm reformash dhe përkushtim institucional ndaj forcimit të sundimit të ligjit.
Sipas raportit, gjatë vitit 2025 janë planifikuar gjithsej 116 aktivitete, prej të cilave 66 janë realizuar plotësisht, ndërsa 50 të tjera janë në proces zbatimi. Shkalla e përgjithshme e realizimit të aktiviteteve ka arritur në 56.9 për qind.
Progresi më i madh është regjistruar në fushën e gjyqësorit dhe prokurorisë publike, ku niveli i realizimit të reformave ka tejkaluar 81 për qind. Ndërkohë, në segmentin e reformave që lidhen me Gjykatën Kushtetuese, shkalla e realizimit ka arritur në 75 për qind.
“Këta tregues konfirmojnë se reformat po zhvillohen me një dinamikë të qartë dhe po japin rezultate konkrete. Çdo hap i realizuar nënkupton një sistem gjyqësor më efikas, siguri më të madhe juridike dhe institucione më të forta për qytetarët”, deklaroi ministri Filkov.
Raporti paraqet një pasqyrë të detajuar të progresit të arritur deri më tani dhe synon të shërbejë si bazë për vazhdimin e reformave në përputhje me standardet evropiane dhe prioritetet strategjike të vendit.
admin1