Irani, ende nuk është marrë vendim për raundin e ri të bisedimeve me SHBA

Irani nuk ka vendosur ende nëse do të marrë pjesë në një raund të dytë negociatash me Shtetet e Bashkuara të Amerikës, ka deklaruar zëdhënësi i Ministrisë së Jashtme iraniane.

“Deri tani… nuk kemi plane për raundin e ardhshëm të negociatave dhe nuk është marrë asnjë vendim në këtë drejtim,” tha zëdhënësi Esmail Baghaei, sipas një përkthimi të agjencisë AFP.

Ndërkohë, presidenti Donald Trump ka deklaruar se po dërgon një delegacion në Pakistan, të udhëhequr nga zëvendëspresidenti JD Vance, për bisedime të planifikuara për mbrëmjen e së hënës. Në delegacion pritet të marrin pjesë edhe i dërguari për Lindjen e Mesme, Steve Witkoff, si dhe dhëndri i Trump, Jared Kushner.

Në Islamabad, Pakistan, ku pritet të zhvillohen bisedimet, janë vendosur masa të forta sigurie.

Sipas mediave shtetërore iraniane të së dielës, zyrtarët e Teheranit nuk kishin plan të merrnin pjesë në negociata për shkak të “vazhdimit të bllokadës detare të ashtuquajtur, shkeljes së armëpushimit dhe retorikës kërcënuese nga SHBA”.