By admin 
Një projekt i furnizimit me ujë, i promovuar me bujë nga përfaqësues të qeverisë dhe pushtetit lokal në Podujevë, është bërë objekt kritikash pasi banorët pretendojnë se sistemi ka funksionuar vetëm ditën e inaugurimit.
Sipas pretendimeve të ngritura publikisht, investimi me vlerë mbi 9 milionë euro, i destinuar për furnizimin me ujë të pijshëm në 10 zona të Podujevës dhe i nisur në fshatin Lupç, nuk ka vazhduar të funksionojë normalisht pas promovimit zyrtar.
Kritikat janë përqendruar në faktin se vetëm dy ditë pas ceremonisë së promovimit, sistemi nuk po furnizon me ujë zonat e premtuara, duke ngritur pikëpyetje mbi gjendjen reale të projektit dhe funksionalitetin e tij.
Në inaugurimin e projektit kishin marrë pjesë deputeti i Lëvizjes Vetëvendosje, Armend Muja, dhe kryetari i Komunës së Podujevës, Shpejtim Bulliqi, të cilët kishin uruar banorët për investimin e realizuar.
Banorët dhe kritikët e projektit po kërkojnë sqarime nga institucionet përgjegjëse lidhur me arsyet e mosfunksionimit të sistemit, ndërsa deri tani nuk ka pasur një reagim zyrtar për këto pretendime.
Çështja pritet të ngjallë debat politik dhe publik, për shkak të vlerës së lartë të investimit dhe rëndësisë që ka furnizimi me ujë për banorët e zonës.
admin7