Befasi në listën e PDK-së: Komandantët e UÇK-së rrezikojnë të mbeten jashtë Kuvendit

Tre figura të lidhura ngushtë me Ushtrinë Çlirimtare të Kosovës rrezikojnë të mbeten jashtë kuvendit të ri, sipas numërimit të votave të pjesshme.

Pas numërimit të rreth 20% të votave të kandidatëve për deputetë, tre nga nismëtarët e UÇK-së, komandanti Rrustem Mustafa dhe veprimtarët Xhabit Haliti e Nait Hasani, ndodhen jashtë emrave të projektuar për të siguruar ulëse në legjislaturën e re.

Partia Demokratike e Kosovës projektohet të ketë 22 deri në 23 mandate në kuvendin e ri, bazuar në rezultatet preliminare të Komisionit Qendror të Zgjedhjeve.

Ndërkaq, Rrustem Mustafa, Xhavit Haliti dhe Nait Hasani renditen në pozitat 29-31 për nga numri i votave të siguruara, pas numërimit të saktësisht 21,30% të vendvotimeve.

Aktualisht, ata kanë një diferencë prej rreth 600 votash me Rashit Qalajn, kandidatin e fundit për deputet që ndodhet në zonën e mandateve të PDK-së.