By admin 
Presidenti i SHBA-së, Donald Trump, është vënë në qendër të polemikave pas vendimit për të organizuar një event të madh të arteve marciale të përziera (MMA) në ambientet e Shtëpisë së Bardhë, në kuadër të festimeve për 250-vjetorin e pavarësisë së Shteteve të Bashkuara.
Ngjarja, e quajtur “UFC Freedom 250”, do të zhvillohet në një arenë të përkohshme të ngritur në South Lawn, ku do të garojnë 14 luftëtarë elitarë të UFC-së. Arena është ndërtuar për të pritur mijëra spektatorë, ndërsa një audiencë shumë më e madhe pritet ta ndjekë aktivitetin përmes ekraneve gjigante të vendosura pranë kompleksit presidencial. transmeton faktiditor.info
Trump e ka cilësuar eventin si një simbol të “shpirtit luftarak amerikan” dhe një nga atraksionet kryesore të festimeve kombëtare. Megjithatë, iniciativa ka ngjallur reagime të forta nga kritikët, të cilët vlerësojnë se përdorimi i Shtëpisë së Bardhë për një spektakël sportiv me dimensione të theksuara komerciale dhe politike nuk është i përshtatshëm për institucionin më të lartë të vendit.
Debati është thelluar edhe më tej pasi një grup opozitar ka ngritur padi federale, duke e cilësuar organizimin e eventit si një “keqpërdorim të monumenteve kombëtare” dhe një precedent të rrezikshëm për përdorimin e hapësirave shtetërore.
Ngjarja konsiderohet gjithashtu si një tjetër dëshmi e marrëdhënies së ngushtë mes Trump dhe presidentit të UFC-së, Dana White. Miqësia mes tyre daton prej më shumë se dy dekadash, kur Trump mbështeti organizimin e eventeve të UFC-së në pronat e tij në një periudhë kur sporti përballej me kundërshtime të shumta në Shtetet e Bashkuara.
Pavarësisht kritikave, organizatorët presin që “UFC Freedom 250” të tërheqë vëmendje të madhe publike dhe mediatike, duke e kthyer festimin e 250-vjetorit të pavarësisë amerikane në një nga ngjarjet më të komentuara të vitit.transmeton faktiditor.info