By admin2 
Gjykata Themelore në Tetovë ka konstatuar se akuzat e bëra publikisht ndaj ish-drejtorit të SHMKM “Nikolla Shtejn”, Binas Pajaziti, për keqpërdorim të mjeteve financiare, malverzime dhe veprimtari të paligjshme kanë qenë të pavërteta dhe të pambështetura me prova.
Lajmin e bëri të ditur vetë Pajaziti përmes një postimi publik, duke njoftuar se gjykata ka vendosur në procesin gjyqësor të iniciuar prej tij kundër Liridon Dishës për shpifje dhe akuza të pabaza informon Tetovasot.
Sipas vendimit gjyqësor, gjatë procedurës nuk është paraqitur asnjë provë apo dokument relevant që do të vërtetonte pretendimet e bëra në konferencën për shtyp të mbajtur më 10 tetor 2024, ku Pajaziti ishte akuzuar për keqpërdorime gjatë ushtrimit të detyrës së drejtorit.
“Gjykata konfirmoi se këto akuza kanë qenë të pavërteta”, shkruan Pajaziti, duke theksuar se deklaratat e bëra publikisht kanë dëmtuar nderin, dinjitetin dhe integritetin e tij profesional e personal.
Ai vlerëson se dëmi i shkaktuar nga akuzat publike nuk matet vetëm me fjalë, por edhe me pasojat që lënë në familje, profesion dhe në figurën publike të një personi.
Megjithatë, Pajaziti njofton se ka ushtruar ankesë në Gjykatën e Apelit, pasi konsideron se dëmshpërblimi i caktuar nga shkalla e parë është simbolik dhe nuk përfaqëson një kompensim të drejtë për dëmin moral të shkaktuar.
“Askush nuk duhet të akuzohet publikisht pa prova dhe pa mbajtur përgjegjësi për pasojat e fjalëve të veta. Liria e shprehjes është një vlerë demokratike, por ajo nuk përfshin të drejtën për të shpifur”, thekson ai në reagimin e tij.
Në fund, Pajaziti falënderoi qytetarët, kolegët, miqtë dhe familjarët për mbështetjen e dhënë gjatë gjithë procesit, duke shtuar se e vërteta dhe drejtësia duhet të mbrohen përmes institucioneve.Tetovasot
Postimi i plotë i Binas Pajazitit:
Të nderuar miq, shok e familjar po e ndaj me ju vendimin e Gjykatës themelore-Tetovë në lidhje me procesin gjyqësor që e kam inicuar ndaj Liridon Disha për shpifje dhe akuza të pabaza.
Gjykata konfirmoi se akuzat ishin të pavërteta – por a mund të kompensohet me të vërtetë një reputacion i dëmtuar?
Gjykata Themelore -Tetovë ka konstatuar se ndaj meje, Binas Pajaziti, janë bërë publikisht deklarata të pavërteta nga Liridon Disha në konferencën për shtyp të mbajtur më 10.10.2024, me ç’rast jam akuzuar për keqpërdorim të mjeteve financiare, malverzime dhe veprimtari të paligjshme gjatë ushtrimit të funksionit drejtor i SHMKM “Nikolla Shtejn”-Tetovë. Gjatë procedurës gjyqësore u vërtetua se për këto akuza nuk ka ekzistuar asnjë provë dhe asnjë dokument relevant që do të mund të konfirmonte vërtetësinë e tyre.
Me fjalë të tjera, gjykata konfirmoi se këto akuza kanë qenë të pavërteta.
Akuzat nuk janë bërë në heshtje apo në rrethana private. Ato janë bërë publikisht, në konferencë për shtyp, para mediave dhe para gjithë opinionit, duke cenuar rëndë nderin, dinjitetin dhe integritetin tim personal e profesional. Për vite me radhë kam punuar me përkushtim në arsim dhe në jetën publike, duke ndërtuar me mund, ndershmëri dhe përgjegjësi reputacionin tim. Prandaj, kur dikush të akuzon pa asnjë provë për keqpërdorim të mjeteve publike, korrupsion apo malverzime, nuk ka sulmuar vetëm emrin tim, por edhe besimin që qytetarët kanë ndërtuar ndaj meje, por edhe ndaj institucionit që kam drejtuar, duke cenuar kredibilitetin dhe integritetin e tij para opinionit. Dëmi që shkaktojnë akuza të tilla të pavërteta nuk matet vetëm me fjalë, por me pasojat që ato lënë mbi familjen, profesionin dhe figurën publike të një njeriu.
Për këtë arsye kam ushtruar ankesë në Gjykatën e Apelit, sepse konsideroj se dëmshpërblimi simbolik nuk përfaqëson një kompensim të drejtë për dëmin moral të konstatuar nga gjykata. Kur një person akuzohet publikisht pa asnjë provë dhe gjykata konstaton se këto pretendime janë të pavërteta, drejtësia nuk mund të reduktohet në një shumë simbolike.
Kjo çështje nuk ka të bëjë vetëm me mua. Ajo ka të bëjë me parimin se askush nuk duhet të akuzohet publikisht pa prova dhe pa mbajtur përgjegjësi për pasojat e fjalëve të veta. Liria e shprehjes është një vlerë demokratike, por ajo nuk përfshin të drejtën për të shpifur dhe për të dëmtuar reputacionin e tjetrit me pretendime të pavërteta.
Besoj se institucionet gjyqësore do të sigurojnë mbrojtje të plotë të dinjitetit, nderit dhe reputacionit të çdo qytetari dhe se e vërteta e konstatuar në procedurë do të marrë edhe vlerësimin e duhur juridik.
Faleminderit të gjithë qytetarëve, kolegëve, miqve dhe familjarëve që gjatë gjithë kësaj periudhe më kanë mbështetur dhe kanë besuar në të vërtetën.
Për shpifësit nuk kam fjalë, sepse askush nuk ngrihet duke ulur të tjerët.
admin7