Komisioni Evropian ka miratuar një ilaç të ri për trajtimin e kancerit të pankreasit.
Ilaçi daraxonrasib, i cili tregtohet me emrin Rasonque, nuk premton shërim, por synon të zgjasë mbijetesën e pacientëve krahasuar me kimioterapinë. Ilaçi mund të përdoret te pacientët e rritur që kanë marrë më parë të paktën një lloj trajtimi kundër kancerit, njoftoi Komisioni në Bruksel.
Agjencia Evropiane e Barnave (EMA) kishte rekomanduar miratimin e tij në tetor.
Ilaçi i ri synon të ngadalësojë rritjen e qelizave tumorale. Ai vepron mbi një proteinë në qeliza, e cila është e ndryshuar në rreth 90% të rasteve të kancerit të pankreasit dhe shkakton shumimin e pakontrolluar të qelizave kancerogjene.
Në një studim ku morën pjesë 500 pacientë me kancer të pankreasit në fazë të avancuar, efekti i ilaçit në mbijetesë u krahasua me atë të kimioterapisë. Pacientët që morën daraxonrasib jetuan mesatarisht edhe 12,4 muaj, krahasuar me 6,7 muaj për ata që u trajtuan me kimioterapi.
Kanceri i pankreasit për një kohë të gjatë nuk shkakton simptoma ose shfaq vetëm simptoma jospecifike, si humbje në peshë apo dhimbje në pjesën e sipërme të barkut ose në shpinë. Për këtë arsye, tumori shpesh zbulohet vonë, në shumë raste vetëm pasi është përhapur.
Ky lloj kanceri është vdekjeprurës brenda një kohe të shkurtër për shumicën e personave të prekur. Sipas të dhënave të regjistrave të kancerit të Institutit Robert Koch (RKI), agjencia shtetërore gjermane e shëndetësisë, vetëm rreth një në 10 persona është ende gjallë pesë vjet pas diagnostikimit. Sëmundja zakonisht shfaqet te personat mbi 70 vjeç./DPA News



