By admin 
Një emër i ri po hyn në skenën e madhe të boksit botëror dhe ai është boksieri shqiptar Kristian Prenga. Ai pritet të përballet këtë verë me ish-kampionin botëror Anthony Joshua, në një duel që mund të ndryshojë rrjedhën e karrierës së tij.
Meçi është planifikuar të zhvillohet më 25 korrik në Riad të Arabisë Saudite dhe shihet si një hap i rëndësishëm për Joshuan drejt një super-përballjeje të mundshme me Tyson Fury më vonë gjatë vitit. Megjithatë, Prenga nuk ka ndërmend të jetë thjesht një kundërshtar kalimtar.
“Anthony Joshua është një luftëtar i madh, por ka bërë një gabim të madh që më ka zgjedhur mua,” është shprehur shqiptari, duke paralajmëruar një surprizë të madhe në ring. Ai shton se kjo është një mundësi që mund t’i ndryshojë jetën dhe se është gati të prishë planet e mëdha të kampit britanik.
Prenga vjen në këtë sfidë me një rekord mbresëlënës prej 20 fitoresh dhe vetëm një humbjeje, ku të gjitha fitoret i ka arritur me nokaut. Humbja e vetme daton në vitin 2017 ndaj italianit Giovanni Auriemma, ndërsa që atëherë ai ka ndërtuar një seri fitoresh bindëse.
Edhe pse nuk renditet mes emrave kryesorë në organizatat më të mëdha të boksit, Prenga ka treguar potencial të madh dhe stil të veçantë në ring. Me gjatësi 1.96 metra, ai përdor në mënyrë efektive distancën dhe goditjet si “jab”, “uppercut” dhe kombinimet në trup, duke i mbyllur shumicën e dueleve me nokaut.
Nga ana tjetër, përballja me Joshuan shihet si një test për britanikun para sfidave më të mëdha. Por historia e boksit ka treguar se nënvlerësimi mund të kushtojë shtrenjtë, sidomos në peshat e rënda.
Mbetet për t’u parë nëse Kristian Prenga do të arrijë të realizojë premtimin e tij për të “tronditur botën”, apo nëse Anthony Joshua do të vazhdojë rrugën drejt përballjes së shumëpritur me Tyson Fury.
admin2