By admin1 
Fotot e ushtarëve ukrainas të rraskapitur nga uria kanë zbuluar kushtet e rënda në front, ndërsa edhe ushtarët rusë po përballen me mungesë serioze ushqimi.
Në Kyiv, në fund të prillit, reagime të shumta shkaktuan lutjet dhe fotografitë e katër ushtarëve të dobësuar skajshëm.
Raportohet se ata kishin mbetur pa furnizime ushqimore deri në 17 ditë në vijën e frontit dhe për muaj të tërë nuk ishin zëvendësuar nga njësi të tjera.
“Luftëtarët po humbin ndjenjat nga uria, pinë ujë shiu”, shkroi më 22 prill në rrjetet sociale Anastasia Silchuk, bashkëshortja e një ushtari të Brigadës së 14-të të Mekanizuar.
Ushtarët ishin të bllokuar në bregun lindor të lumit Oskil, në rajonin juglindor të Donetskut, pasi bombardimet ruse kishin shkatërruar urat që i lidhnin me brigadën e tyre në bregun tjetër.
“Ata nuk po dëgjoheshin në radio, ose ndoshta askush nuk donte t’i dëgjonte. Burri im bërtiste dhe lutej, duke thënë se nuk kishin ushqim e ujë”, shkroi ajo.
Një ushtar ukrainas, Oleksandr, i cili ka shërbyer së fundmi në front, tha për Al Jazeera se ka përjetuar vetë efektet e urisë ekstreme gjatë luftës për vendin e tij.
I fshehur në një bunker të izoluar në vijën e hapur të frontit në juglindje të Ukrainës, ai tregoi se më shumë se familjen apo jetën para pushtimit rus të vitit 2022, i mungonte ushqimi i vërtetë.
“Ëndërron për një vakt të ngrohtë, sepse për javë të tëra merr vetëm çokollata, tërshërë dhe një shishe ujë në ditë”, tha ai nga një qendër rehabilitimi në Kyiv, ku po rikuperohej nga një plagë në këmbë.
Ushtari 31-vjeçar, me tatuazhe dhe me një kapak qeramike në gju, nuk pranoi të zbulojë mbiemrin apo detaje të tjera të shërbimit për shkak të protokolleve të luftës.
Dronët kanë ndryshuar luftën
Zhvillimi i madh i dronëve ushtarakë, që patrullojnë 24 orë mbi zonën e luftës deri në 25 kilometra nga të dyja anët e frontit, ka bërë pothuajse të pamundur lëvizjen nëpër llogore apo përdorimin e automjeteve të furnizimit.
Këto ndryshime teknologjike dhe taktike kanë kthyer pozicionet ukrainase në pika të izoluara, ku furnizimi me ushqim, municion, ilaçe dhe gjeneratorë është bërë çështje jete a vdekjeje.
“Kohët kur mund të dilje nga bunkeri për të pirë një cigare kanë marrë fund”, tha Ihor, komandant i një njësie dronësh në lindje të Ukrainës.
Edhe pala ruse përballet me rreziqe të mëdha, pasi ushtarët urdhërohen të lëvizin në grupe të vogla për të shmangur ukrainasit dhe për të grumbulluar municion e trupa për sulme të vogla.
Por shpesh ata zbulohen dhe goditen nga dronët.
Dronët vetëvrasës, të vegjël dhe të mbushur me eksploziv, kanë bërë që tanket dhe automjetet e blinduara të duken si teknologji të vjetruara.
Sipas Oleksandrit, i vetmi mjet që mund t’i shpëtojë një droni është një automjet me katër rrota që lëviz me shpejtësi dhe zig-zage deri në 120 kilometra në orë.
“Një herë humbëm katër kamionçina brenda një dite”, tha ai.
Furnizimi nga ajri
Karrocat robotike me kamera arrijnë të transportojnë municion dhe ushqim në vijën e frontit, madje të tërheqin edhe ushtarët e plagosur.
Megjithatë, ato varen nga dronët vëzhgues për orientim. Dronët më të mëdhenj bombardues, që mund të lëshojnë ngarkesa me disa kilogramë furnizime, janë shpesh shpëtimi i vetëm.
Sipas Andriy Pronin, një nga pionierët e luftës me dronë në Ukrainë, prej të paktën një viti logjistika në front kryhet kryesisht përmes dronëve ose mjeteve robotike.
“Shumica e miqve të mi në front marrin gjithçka në kohë, një herë në ditë ose çdo dy ditë, sipas planit”, tha ai për Al Jazeera.
Por studiuesi Nikolay Mitrokhin nga Universiteti i Bremenit në Gjermani vlerëson se furnizimet me dronë mbulojnë jo më shumë se 10 për qind të ushtrisë ukrainase.
Pak ditë pasi fotografitë e ushtarëve të uritur u bënë virale, oficerët e brigadës deklaruan se “çdo gjë, nga një copë bukë deri te një gjenerator i çmontuar, po dërgohet nga ajri”, por se forcat ruse po rrëzojnë sa më shumë dronë të jetë e mundur.
Megjithatë, komandanti i brigadës u shkarkua nga detyra.
Ministria e Mbrojtjes së Ukrainës urdhëroi hetim dhe deklaroi më 28 prill se mungesa e furnizimeve ushqimore në këtë brigadë dhe në dy njësi të tjera “nuk duhet të bëhet problem sistematik”.
Ushtarët rusë të lënë në uri
Edhe ushtarët rusë shpesh dërgohen në misione tepër të rrezikshme me pothuajse fare ushqim.
“Më dhanë një shishe të vogël ujë dhe dy ose tre çokollata shumë të vogla”, tha Mohammad, një emigrant nga Taxhikistani, i cili pretendon se u mashtrua për të luftuar kundër Ukrainës.
Ai tregoi se kishte kaluar gati një muaj në një fshat të braktisur në rajonin lindor të Luhanskut, ku kërkonte makarona të thata dhe mbetje ushqimore për të mbijetuar.
Sipas tij, para luftës peshonte 76 kilogramë, ndërsa edhe pas disa javësh me tre vakte në ditë në një qendër ukrainase për robërit e luftës, pesha e tij kishte mbetur vetëm 60 kilogramë.
Në tetor 2025, inteligjenca ukrainase pretendoi se qindra, në mos mijëra ushtarë rusë ishin braktisur në ishujt e lumit Dnipro, mes zonave të kontrolluara nga Rusia dhe Ukraina në rajonin jugor të Khersonit, duke pasur “probleme serioze” me furnizimet ushqimore dhe municionin.
Madje janë raportuar edhe raste të pakonfirmuara të kanibalizmit mes ushtarëve rusë të uritur.
Në fund të prillit, gazeta britanike The Times publikoi një bisedë të përgjuar mes dy oficerëve rusë, ku flitej për një ushtar që kishte vrarë një bashkëluftëtar, “i kishte prerë këmbën” dhe po përgatitej ta hante, por më pas ishte vrarë nga një tjetër ushtar rus.
admin5 
admin7