By admin7 
Prokuroria Themelore në Prizren, në koordinim me Njësinë rajonale për Hetimin e Krimeve Ekonomike dhe Korrupsionit në Prizren, si edhe në bashkëpunim me Doganën e Kosovës dhe Administratën Tatimore të Kosovës (ATK), ka zhvilluar veprime hetimore lidhur me dyshimet se disa biznese për shitjen e arit në Prizren janë përfshirë në veprimtari të kundërligjshme, duke iu shmangur detyrimeve doganore dhe tatimore lidhur me tregtimin e arit dhe argjendit.
Pas ndërmarrjes së veprimeve hetimore që kanë nisur nga data 19 maj, me urdhër të prokurorit të çështjes dje janë realizuar kontrolle në gjashtë lokale afariste në Prizren dhe në tri shtëpi banimi.
Gjatë kontrolleve janë siguruar dëshmi materiale dhe është hasur sasi e konsiderueshme e arit dhe argjendit të padeklaruar, dhe është iniciuar rast ndaj katër personave për veprat penale “Shmangia nga tatimi” dhe “Shmangia nga pagesa e tarifave të detyrueshme doganore ose tarifave akcizore”.
Nga kontrollet e realizuara janë sekuestruar gjithsej: 3.775,33 gramë ari i padeklaruar, në vlerë të përafërt prej rreth 455.000 euro, si dhe 4.204,98 gramë argjend i padeklaruar, në vlerë të përafërt prej rreth 8.900 eurosh.
Po ashtu, gjatë kontrolleve në dy lokacione të ndryshme janë gjetur dhe sekuestruar dy armë/pistoleta pa leje dhe është iniciuar rast për veprën penale “Mbajtja në pronësi, kontroll ose posedim të paautorizuar të armëve”.
Prokuroria Themelore në Prizren, në bashkëpunim me institucionet relevante të zbatimit të ligjit, mbetet e përkushtuar në ndjekjen e rasteve të shmangies nga tatimi, evazionit doganor dhe çdo forme tjetër të kriminalitetit ekonomik. Hetimet lidhur me këtë rast janë duke vazhduar.
admin