Një debat për një shejlong në hije në një plazh të njohur pranë Athinës ka përfunduar me një fatalitet. Një 82-vjeçar ndërroi jetë në spital të dielën, pasi u përfshi në një përleshje fizike me një 76-vjeçar.
Ngjarja ndodhi pak pas orës 09:00 në plazhin Vouliagmeni, në jug të Athinës. Sipas raportimeve të mediave greke, 82-vjeçari kishte mbërritur së bashku me bashkëshorten dhe kishte zënë dy shezlongë të lirë.
Pak më vonë, në plazh mbërriti një 76-vjeçar i shoqëruar nga një 21-vjeçare. Mes dy çifteve nisi një debat për vendet në plazh, ndërsa situata u tensionua për shkak të kërkesës së madhe për shezlongët në hije.
Katër tentativa për ta shpëtuar
Gjatë konfliktit, 21-vjeçarja shfaqi probleme shëndetësore dhe u dërgua në pikën mjekësore të plazhit.
Por tensionet nuk u shuan. Kur 76-vjeçari u kthye, mes dy burrave shpërtheu sërish konflikti, i cili këtë herë kaloi në përleshje fizike.
Në mes të incidentit, 82-vjeçari u rrëzua përtokë dhe humbi ndjenjat. Sipas gazetës greke Protothema, ekipet e emergjencës tentuan katër herë ta reanimonin, duke përdorur edhe defibrilatorin. Përpjekjet rezultuan të pasuksesshme.
82-vjeçari u transportua me urgjencë në spital, por rreth një orë më vonë ndërroi jetë.
“Dëgjuam ulërima dhe pamë një sherr”
Në momentin e incidentit, plazhi ishte i mbushur me pushues. Disa prej tyre dëshmuan përleshjen.
“Dëgjuam ulërima, vrapuam për të parë se çfarë po ndodhte dhe pamë një sherr”, tha një dëshmitar për Protothema.
Sipas raportimeve, 76-vjeçari dhe shoqëruesja e tij 21-vjeçare janë shoqëruar në polici.
Autoritetet greke kanë nisur hetimet për të përcaktuar rrethanat e sakta të vdekjes së 82-vjeçarit dhe nëse ajo lidhet drejtpërdrejt me përleshjen.
AKSION I MADH POLICOR: Bastisje në Shkup, Tetovë dhe Gjevgjeli, jozyrtarisht gjashtë të arrestuar
admin7