Finlanda dhe Suedia njoftuan se dërguan avionë luftarakë për të kapur dhe identifikuar avionë ushtarakë rusë në hapësirën ajrore ndërkombëtare mbi Gjirin e Finlandës, në operacionin e parë të përbashkët të këtij lloji mes dy vendeve nordike, transmeton Reuters.
Rajoni i Baltikut, pjesë e të cilit është edhe Gjiri i Finlandës, është në gjendje gatishmërie të shtuar pas incidenteve që lidhen me ndërprerjet e gazsjellësve, shkeljet e hapësirës ajrore dhe vëzhgimet e dronëve pas pushtimit të plotë të Ukrainës nga Rusia në vitin 2022.
Kryeministri suedez Ulf Kristersson tha se operacioni, i cili u zhvillua të enjten, tregoi se i ashtuquajturi bashkëpunim për reagim të shpejtë mund të monitorojë dhe mbrojë hapësirën ajrore të të dyja vendeve.
“Ky është një shprehje konkrete e gatishmërisë dhe besimit që kemi ndërtuar së bashku – dhe një shprehje e fuqisë së bashkëpunimit nordik, nordiko-baltik dhe më të gjerë të NATO-s në pjesën tonë të botës”, shkroi Kristersson në një postim në rrjetin social X.
“Deti Baltik nuk ka qenë kurrë më i cenueshëm se tani – por gjithashtu nuk ka qenë kurrë më i mbrojtur se tani”, tha ai.
Avionët e të dyja forcave ajrore gjetën dhe identifikuan një grup avionësh rusë, përfshirë një avion transporti dhe disa avionë luftarakë, njoftuan Forcat Ajrore finlandeze.
Finlanda dhe Suedia iu bashkuan NATO-s pas pushtimit rus të Ukrainës në vitin 2022, duke hequr dorë nga politika e tyre shumëvjeçare e mosangazhimit. Fqinjët e tyre nordikë, Norvegjia, Islanda dhe Danimarka, tashmë ishin anëtare të Aleancës Atlantike, ashtu si edhe tri republikat baltike, Estonia, Letonia dhe Lituania.
Admin 9