Duke mbërritur për një samit në Bruksel, kancelari gjerman Friedrich Merz tha të enjten se udhëheqësit evropianë mbeten gjerësisht të ndarë mbi buxhetin e ardhshëm afatgjatë të Bashkimit Evropian.
“Po përballemi me negociata të vështira”, u tha Merz gazetarëve në vendin e samitit, duke shtuar se udhëheqësit do të zhvillojnë bisedime intensive dhe konstruktive, por se nuk ka gjasa të arrihet një marrëveshje në ditët në vijim.
“Shpresoj që të arrijmë një rezultat mbi kuadrin financiar shumëvjeçar deri në fund të vitit, megjithëse idetë brenda Bashkimit Evropian janë shumë larg njëra-tjetrës sot”, tha ai.
“Ne përballemi me negociata të vështira, por unë hyj në këto negociata me vullnetin e fortë për t’i çuar ato në një rezultat të mirë. Sepse Evropa duhet të mbetet e aftë të veprojë dhe të bëhet sovrane”, shtoi ai.
Merz kritikoi propozimin e fundit të kompromisit të Irlandës për buxhetin e BE-së, duke thënë se shkurtimet e planifikuara janë shumë më të ulëta se sa është e nevojshme për një marrëveshje.
“Ne duhet ta zvogëlojmë ndjeshëm buxhetin e përbashkët, krahasuar me propozimet e Komisionit (Evropian). Asnjë shtet anëtar në Bashkimin Evropian nuk mund të përballojë të paguajë kontribute në Bashkimin Evropian në këtë shkallë”, tha ai.
Ai vuri në dukje se propozimi aktual është 50% mbi nivelin e financimit të kuadrit financiar shumëvjeçar në vazhdim./ AA.
admin5