Me pikëllim të thellë është pritur lajmi për ndarjen nga jeta të Bajram Isufit nga Zhegra e Gjilanit, veteran i tri luftërave çlirimtare dhe atdhetar i përkushtuar, i cili gjatë gjithë jetës së tij dha kontribut për çështjen kombëtare, vendlindjen dhe komunitetin.
Bajram Isufi rridhte nga një familje me tradita të thella patriotike, pasardhëse e familjes së heroit kombëtar Idriz Seferi. I rritur në frymën e atdhedashurisë dhe sakrificës për vendin, ai ndoqi rrugën e paraardhësve të tij, duke dëshmuar përkushtim ndaj çështjes kombëtare dhe lirisë.
Ai ishte pjesëmarrës në tri luftërat çlirimtare, duke u rreshtuar në përpjekjet për lirinë e shqiptarëve. Kontributi i tij atdhetar përbën një pjesë të rëndësishme të jetës dhe veprimtarisë së tij.
Përveç angazhimit kombëtar, Isufi u dallua edhe në jetën publike dhe institucionale. Në Gjilan u njoh si profesionist, udhëheqës i zellshëm dhe njeri i urtë e i ndershëm. Ai drejtoi ndërmarrje dhe institucione të ndryshme, ndërsa së fundmi ishte në krye të Ndërmarrjes Publike Lokale “Tregu” në Gjilan.
Gjatë karrierës së tij shërbeu edhe si këshilltar komunal dhe drejtor i Drejtorisë së Bujqësisë dhe Pylltarisë në Komunën e Gjilanit. Kontribut dha edhe në sport, veçanërisht në zhvillimin e hendbollit, si ish-hendbollist, kryetar i klubit “Zhegra” dhe pjesë e strukturave drejtuese të këtij sporti në Kosovë.
Bajram Isufi u nda nga jeta në moshën 60-vjeçare, duke lënë pas kujtimin e një njeriu që ndërthuri atdhedashurinë, profesionalizmin dhe përkushtimin ndaj njerëzve e vendit të tij.
Vdekja e tij është humbje e madhe për familjen, miqtë, bashkëpunëtorët dhe gjithë ata që patën fatin ta njohin dhe të bashkëpunojnë me të.
Mbledhja komemorative në nderim të jetës dhe veprës së tij do të mbahet më 7 nëntor, në Teatrin e Qytetit të Gjilanit, ndërsa ceremonia e varrimit do të zhvillohet në Zhegër, në orën 14:30.
Stafi i portalit Fakti Ditor shpreh ngushëllimet më të sinqerta për familjen Isufi, të afërmit, miqtë dhe të gjithë bashkëpunëtorët e të ndjerit. Në këto momente të vështira, ndajmë dhimbjen me familjen dhe urojmë që të gjejnë forcë për ta përballuar këtë humbje të madhe.
Lavdi jetës dhe veprës së tij! Qoftë i përjetshëm kujtimi për Bajram Isufin!
admin7