Kina e ndoqi me vëmendje teksa presidenti Donald Trump pësoi një humbje të rëndë në zgjedhjet e mesmandatit.
Publikisht, Pekini vazhdon të jetë i kujdesshëm dhe të mos shprehet shumë, pasi do të ishte tepër herët për të nxjerrë çfarëdo përfundimi, shkruan CNN.
I vetmi reagim zyrtar ka ardhur nga zëdhënësja e Ministrisë së Jashtme të Kinës, Mao Ning, e cila nxitoi t’i cilësonte zgjedhjet e mesmandatit si “çështje të brendshme të Shteteve të Bashkuara”. Ajo përsëriti se Kina është e gatshme të punojë me SHBA-në për të ndërtuar një marrëdhënie dypalëshe konstruktive dhe të qëndrueshme, një konsensus i arritur nga lideri kinez Xi Jinping dhe Trump gjatë samitit të tyre në maj.
Pekini e kupton se, edhe pse demokratët kanë rimarrë kontrollin e të dyja dhomave të Kongresit, një Trump që po i afrohet fundit të mandatit të tij mbetet ende i fuqishëm kur bëhet fjalë për tregtinë dhe politikën e jashtme.
Një armëpushim i brishtë tregtar mes dy ekonomive më të mëdha në botë do të përfundojë në janar – dhe disa analistë thonë se një administratë Trump që nuk shqetësohet më për ndikimin e kundërmasave kineze në zgjedhje mund të jetë më e gatshme të përdorë metoda të ashpra gjatë negociatave të ardhshme.
Meqë humbja dërrmuese e republikanëve shihet gjerësisht si një refuzim ndaj Trumpit, disa anëtarë republikanë të Kongresit mund të kenë gjithashtu më pak frikë ta kundërshtojnë atë dhe të mbajnë një qëndrim më të ashpër ndaj Kinës, nëse Trump vazhdon ta lavdërojë Xi-në dhe të ndjekë një qasje që perceptohet si e butë ndaj Pekinit.
Pekini po përgatitet gjithashtu të presë samitin e Bashkëpunimit Ekonomik Azi-Paqësor, pas më pak se dy javësh, në qendrën e tij të teknologjisë së lartë, Shenzhen, ku Xi është i gatshëm të prezantojë një Kinë më të fuqishme dhe të mirëpresë një varg liderësh.
Atje, pritet që Xi të takohet me Trumpin për herë të tretë këtë vit – dhe dy burrat mund të zhvillojnë një takim historik me presidentin rus, Vladimir Putin, në margjinat e samitit.
Muajin e kaluar, Trump tha se ishte i hapur ndaj kësaj ideje. Ai u tha gazetarëve: “Do ta zhvillonim për të diskutuar armët bërthamore dhe çarmatimin bërthamor”, duke shtuar: “Jam i sigurt se do të diskutonim edhe për gjëra të tjera, si tregtia”.
admin5