Kombëtarja shqiptare ka marrë një fitore të rëndësishme ndaj Finlandës, duke triumfuar me rezultat 2-0 në stadiumin “Air Albania” dhe duke hedhur një hap vendimtar drejt rikthimit në Ligën B të Ligës së Kombeve.
Heroi i mbrëmjes ishte Ernest Muçi, i cili në minutën e 35-të realizoi një gol spektakolar me të jashtmen, duke zhbllokuar rezultatin dhe duke ndezur atmosferën në stadium.
Shqipëria e nisi ndeshjen me ritëm të lartë, duke kërkuar që në minutat e para të merrte kontrollin e lojës. Laçi dhe Asllani provuan të rrezikonin portën finlandeze, ndërsa Muçi ishte një nga lojtarët më aktivë në fazën sulmuese.
Finlanda pati mundësitë e saj, veçanërisht përmes goditjeve standarde, por portieri Etrit Berisha u tregua në lartësinë e detyrës, duke bërë një pritje vendimtare në minutën e 42-të.
Në pjesën e dytë, kuqezinjtë goditën sërish. Vetëm pesë minuta pas rifillimit të lojës, Elseid Hysaj dërgoi një krosim të shkëlqyer nga krahu i djathtë, ndërsa Rey Manaj u tregua i saktë me kokë, duke dyfishuar epërsinë në 2-0.
Shqipëria vazhdoi të kontrollonte ndeshjen, ndërsa në minutën e 67-të mori edhe një avantazh numerik, pasi lojtari finlandez Tenho u ndëshkua me karton të kuq për një ndërhyrje të rëndë ndaj Muçit.
Deri në fund, kombëtarja shqiptare administroi me sukses rezultatin, duke mos lejuar kundërshtarin të rikthehej në lojë.
Me këtë triumf, Shqipëria shkon në kuotën e 12 pikëve pas katër ndeshjesh dhe forcon pozitat në krye të Grupit C1 të Ligës së Kombeve.
Tashmë, kuqezinjtë kanë përpara përballjen e drejtpërdrejtë ndaj Bjellorusisë, në transfertë në Hungari, ku një barazim do të mjaftonte për të siguruar objektivin dhe për të vulosur rikthimin në Ligën B.
Një fitore që konfirmon forcën e Shqipërisë dhe rrit besimin për vazhdimin e këtij rrugëtimi në Ligën e Kombeve.
Rezultati:
Shqipëri – Finlandë 2-0
Shënues: Ernest Muçi (35’), Rey Manaj (50’)
admin 
admin4