RFI: Ushtarakë francezë në Ukrainë prej muajsh

Ushtarë francezë kanë vepruar në Ukrainë prej disa muajsh, duke trajnuar trupat ukrainase dhe duke ndihmuar në mirëmbajtjen e pajisjeve ushtarake.

Lajmi u raportua nga Radio France Internationale, e cila iu referua disa burimeve të ndryshme, që thanë se ligjvënësit francezë nuk ishin vënë në dijeni për dërgimin e një misioni konfidencial, të udhëhequr nga një gjeneral francez dhe të koduar “Volia”, term që në gjuhën ukrainase përkthehet si “liri” dhe “vullnet”.

Në raport nuk specifikohet numri i ushtarëve që kanë marrë pjesë në këtë mision, i cili është i pranishëm në Ukrainë të paktën që nga vera e vitit 2026.

Aty përshkruhet një strukturë “e lehtë dhe fleksibël”, e përbërë nga “grupe të vogla të dërguara për detyra afatshkurtra”.

Disa burime të njohura me çështjen i thanë Radio France Internationale se një mision zyrtar i quajtur “Gerfaut”, i vendosur në Poloni, shërben si mbulesë për praninë e trupave franceze në Ukrainë dhe si pikë hyrëse për dislokimin e tyre në këtë vend.

“Gerfaut” është një kontingjent ushtarak francez i vendosur në Poloni që nga viti 2023, në kuadër të misionit të Bashkimit Evropian për ndihmë ushtarake ndaj Ukrainës.

Në këtë kuadër, personeli i ushtrisë franceze ka për detyrë të trajnojë oficerë, të cilët më pas do të komandojnë njësitë luftarake ukrainase.

Që nga viti 2023, ushtria franceze ka trajnuar 25,000 ushtarë ukrainas, si në Francë, ashtu edhe në Poloni.