Rusia godet Ukrainën me raketa dhe dronë, 10 viktima dhe dhjetëra të plagosur në Kiev dhe Dnipro

Të paktën dhjetë persona kanë humbur jetën si pasojë e një vale të gjerë sulmesh ajrore ruse në disa qytete të Ukrainës, në atë që konsiderohet një nga ofensivat më të mëdha të Moskës në muajt e fundit.

Sipas autoriteteve ukrainase, gjashtë viktima u regjistruan në Dnipro dhe katër në kryeqytetin Kiev. Dhjetëra persona të tjerë mbetën të plagosur, përfshirë edhe fëmijë, ndërsa sulmet gjatë natës goditën ndërtesa banimi dhe objekte infrastrukturore.

Reklame

Ekipet e emergjencës vijuan operacionet e kërkim-shpëtimit në Kiev, ku dyshohet se disa persona kanë mbetur të bllokuar nën rrënoja. Paralajmërimet për sulme ajrore mbetën në fuqi në pjesën më të madhe të vendit gjatë orëve të para të mëngjesit të së martës.

Në kryeqytet, re të mëdha tymi u panë mbi zonat qendrore të qytetit. Kryebashkiaku i Kievit, Vitali Klitschko, u bëri thirrje banorëve të qëndrojnë në strehimore, ndërsa kreu i Administratës Ushtarake të Kievit, Tymur Tkachenko, deklaroi se qyteti po sulmohej me raketa balistike.

Sipas Klitschkos, sulmet shkaktuan zjarre pranë një pike karburanti, një kantieri ndërtimi, disa pallateve dhe dy banesave private. Gjithashtu janë raportuar ndërprerje të energjisë elektrike në pjesë të ndryshme të qytetit.

Një objekt industrial u godit gjithashtu në Zaporizhzhia.

Sulmet vijnë pasi Presidenti i Ukrainës, Volodymyr Zelensky, paralajmëroi të hënën për mundësinë e një sulmi të madh rus dhe u kërkoi qytetarëve të tregojnë kujdes të shtuar ndaj alarmeve ajrore.

“Paralajmërimet e inteligjencës për sulme ruse mbeten në fuqi. Një sulm masiv është i mundur, ata kanë përgatitur një të tillë”, tha Zelensky në mesazhin e tij të përditshëm.

Javën e kaluar, Rusia deklaroi se do të godiste qendra ushtarake dhe vendimmarrëse në Kiev, si përgjigje ndaj një sulmi ukrainas në rajonin e Luhanskut të kontrolluar nga Rusia, ku sipas Moskës humbën jetën 21 persona.

Nga ana tjetër, autoritetet ukrainase i cilësuan kërcënimet ruse si “shantazh të paturpshëm” dhe u kërkuan aleatëve perëndimorë të shtojnë presionin ndaj Moskës.

Ndërkohë, në Rusi, autoritetet në rajonin e Krasnodarit raportuan një zjarr në rafinerinë e naftës Ilsky pas një sulmi me dron. Sipas shërbimeve të emergjencës, nuk pati viktima.

Përshkallëzimi i sulmeve vjen pas skadimit të armëpushimit të përkohshëm në muajin maj. Që prej asaj kohe, Rusia ka ndërmarrë disa valë sulmesh me raketa dhe dronë ndaj Kievit, ndërsa Ukraina ka intensifikuar sulmet me dronë në territorin rus.