Pesë palestinezë janë vrarë dhe tre të tjerë janë plagosur rëndë nga dy sulme izraelite në jug të Rripit të Gazës, të kryera të dielën në mbrëmje dhe të hënën në mëngjes. Sulmet vijnë pavarësisht armëpushimit të hyrë në fuqi në tetor të vitit 2025.
Sipas burimeve mjekësore palestineze, të cituara nga Reuters dhe Al Jazeera, dy persona u vranë të hënën në mëngjes nga një sulm me dron pranë Rafahut, ndërsa tre të tjerë mbetën të plagosur rëndë.
Agjencia palestineze Wafa, duke cituar dëshmitarë okularë, raportoi se droni lëshoi të paktën një raketë drejt një grupi njerëzish të mbledhur pranë xhamisë Muavija, në zonën e al-Mawasit, në veriperëndim të Rafahut. Dy viktimat janë identifikuar dhe ishin 22 dhe 29 vjeç.
Ndërkohë, ushtria izraelite deklaroi për Reuters se kishte shënjestruar një person që e cilësoi si militant të një grupi të armatosur palestinez në jug të Gazës. Sipas saj, rezultatet e operacionit janë ende duke u shqyrtuar.
Një tjetër sulm izraelit u krye të dielën në mbrëmje, duke goditur një tendë në zonën e al-Mawasit, pranë Khan Junisit, ku janë strehuar mijëra palestinezë të zhvendosur nga luftimet. Nga ky sulm u vranë tre palestinezë të tjerë, sipas burimeve mjekësore të cituara nga Reuters. Ushtria izraelite pretendoi se kishte shënjestruar luftëtarë në zonë, por nuk dha detaje të mëtejshme.
Pavarësisht armëpushimit të arritur me ndërmjetësimin e Shteteve të Bashkuara në tetor 2025, sulmet dhe të shtënat në Rripin e Gazës vijojnë. Sipas të dhënave të fundit të Ministrisë së Shëndetësisë në Gaza, që nga hyrja në fuqi e marrëveshjes janë vrarë të paktën 1 493 palestinezë, ndërsa 5 299 të tjerë janë plagosur nga sulmet izraelite.
Që nga fillimi i ofensivës izraelite në Gaza, pas sulmit të Hamasit më 7 tetor 2023, numri i palestinezëve të vrarë ka arritur në të paktën 74 382, ndërsa 175 416 të tjerë janë plagosur. Sulmi i Hamasit në jug të Izraelit, më 7 tetor 2023, shkaktoi rreth 1 200 viktima.
admin5