Një grup antifeminist me origjinë nga Rusia ka marrë përgjegjësinë për dy kërcënime me bomba ndaj fluturimeve në Itali. Mesazhet përmbanin pretendime të rreme për vendosjen e mjeteve shpërthyese në avionë që udhëtonin nga Helsinki dhe Dublini.
Sipas CNN, kërcënimet u dërguan përmes emailit nga një grup që e quan veten “Shteti Mashkullor” (Male State). Mesazhi iu drejtua një kompanie logjistike që bashkëpunon me Aeroportin e Romës-Fiumicino.
Në email pretendohej se mjete shpërthyese ishin vendosur në dy fluturime, njëri nga Helsinki dhe tjetri nga Dublini. Megjithatë, këto pretendime rezultuan të rreme. Një zëdhënës i aeroportit konfirmoi për CNN autenticitetin e pamjes së emailit të publikuar nga televizioni italian SkyTG24.
Një lëvizje e krijuar në Rusi
Sipas Qendrës Ndërkombëtare për Kundër-Terrorizmin, “Shteti Mashkullor” është një lëvizje mizogjine, e themeluar në Rusi në vitin 2016. Grupi më vonë shprehu hapur mbështetje për luftën e Rusisë kundër Ukrainës.
Në vitin 2021, një gjykatë ruse e shpalli organizatën ekstremiste dhe ndaloi veprimtarinë e saj.
Ndërkohë, prej disa ditësh janë raportuar kërcënime të ndryshme ndaj kompanive ajrore dhe mediave në disa vende evropiane. Autoritetet po hetojnë incidentet, ndërsa ende nuk është bërë e qartë nëse të gjitha këto raste kanë të njëjtin autor.
admin