Tensione, përplasje dhe skena kaotike shoqëruan votimin e hartës së re territoriale. Mes vezëve dhe shisheve të hedhura në sallë, mazhoranca miratoi reformën që parashikon 46 bashki në vend.
Kuvendi i Shqipërisë u përfshi nga tensione të forta në minutat e fundit të seancës maratonë për miratimin e hartës së re administrativo-territoriale të vendit. Përplasjet arritën kulmin me mbërritjen e kryeministrit Edi Rama dhe ish-zëvendëskryeministres Belinda Balluku, të cilët u shfaqën në sallë në momentin kur pritej votimi.
Në një atmosferë të tensionuar, deputeti i Partisë Demokratike, Gazment Bardhi, hodhi ujë në drejtim të Ballukut, ndërsa deputetë të tjerë të opozitës hodhën shishe drejt kryeministrit Rama. Në sallë u hodhën edhe vezë, duke e kthyer përfundimin e seancës në një skenë kaosi politik.
Seanca zgjati rreth 14 orë dhe u karakterizua nga debate të ashpra mes opozitës dhe mazhorancës. Demokratët kundërshtuan projektligjin, duke akuzuar qeverinë se ndryshimet në ndarjen territoriale po bëheshin pa konsultim të mjaftueshëm me qytetarët dhe komunitetet lokale.
Kreu i Partisë Demokratike, Sali Berisha, kërkoi që reforma t’i nënshtrohej referendumit, ndërsa opozita insistoi në tërheqjen e projektligjit.
Pavarësisht përplasjeve, reforma u miratua. Pak pas mesnatës, Kuvendi votoi pro hartës së re territoriale me 85 vota, duke i hapur rrugë organizimit të ri administrativo-territorial të Shqipërisë me 46 bashki.
Votimi shënoi një tjetër përplasje të fortë politike mes mazhorancës dhe opozitës, ndërsa mënyra e hartimit dhe miratimit të reformës pritet të mbetet objekt debati në skenën politike shqiptare.
admin 
admin7