Ben Affleck nuk ka profil aktiv në Instagram, ndërsa arsyeja është sa e pazakontë, aq edhe ironike. Aktori i njohur i Hollywoodit ka treguar se platforma ia ka bllokuar profilin dy herë, pasi dyshoi se dikush po shtirej si vetë Ben Affleck.
Në një intervistë për revistën Variety, aktori foli për presionin që rrjetet sociale u krijojnë aktorëve të rinj, të cilët shpesh ndihen të detyruar të mbledhin sa më shumë ndjekës për të qenë të suksesshëm, transmeton Indeksonline.
Ndërkohë, ish-bashkëshortet e tij janë mjaft të popullarizuara në rrjetet sociale. Jennifer Garner, me të cilën ka tre fëmijë, ndiqet nga 17.2 milionë persona në Instagram, ndërsa Jennifer Lopez, nga e cila u nda në vitin 2024, ka plot 239 milionë ndjekës, shkruan Vanity Fair.
Affleck pranoi se nuk do të ishte aspak i suksesshëm në rolin e një influenceri dhe se nuk e kupton presionin që ndiejnë aktorët e rinj për të krijuar një audiencë të madhe në rrjetet sociale.
“Do të isha një influencues i tmerrshëm. Aktorët e rinj ndiejnë një presion të madh për të mbledhur ndjekës në rrjetet sociale. Unë nuk do të isha i mirë në këtë drejtim”, u shpreh ai.
Aktori tregoi gjithashtu se përpjekjet e tij për të përdorur Instagramin nuk kishin shkuar edhe aq mirë.
“Ma bllokuan profilin në Instagram dy herë, sepse menduan se po shtiresha si vetvetja”, rrëfeu Affleck.
Megjithatë, ai nuk e kishte përdorur platformën për të promovuar filmat e tij apo për të krijuar një audiencë të madhe. Qëllimi i tij ishte shumë më i thjeshtë: të ndiqte aktivitetin e fëmijëve të tij në rrjetet sociale.
“Kjo ishte vetëm një justifikim për të parë profilet e fëmijëve të mi. Kisha gjashtë ndjekës. Ishin fëmijët e mi dhe disa nga miqtë e tyre”, tregoi aktori.
Zbulon si duket jeta e tij e përditshme me fëmijët
Gjatë intervistës, Affleck foli edhe për jetën e tij private, duke pranuar se përditshmëria e tij nuk është aq e bujshme sa mund të mendojë publiku.
“Në jetën time nuk ka asgjë skandaloze apo veçanërisht interesante. Punoj shumë dhe më pas shkoj t’i marr fëmijët nga shkolla. Darkojmë së bashku nëse ata dëshirojnë të kalojnë kohë me mua. Një javë janë tek unë dhe një javë tek nëna e tyre”, rrëfeu ai.
Pavarësisht famës së madhe në Hollywood dhe popullaritetit të ish-bashkëshorteve të tij në rrjetet sociale, Ben Affleck duket se nuk ka shumë interes për të ndërtuar një imazh publik në Instagram. Për të, platforma kishte vetëm një qëllim: të qëndronte i informuar për jetën e fëmijëve të tij.
admin4