Sulmet ruse gjatë natës kanë dëmtuar më shumë se 10 objekte të infrastrukturës energjetike në Ukrainë, duke lënë të paktën 550 mijë familje pa energji elektrike. Lajmi u bë i ditur nga presidenti ukrainas, Volodymyr Zelensky, përmes një postimi në rrjetin social X.
Sipas Zelensky-t, ekipet e riparimit kanë nisur punën në zonat e goditura për të rikthyer furnizimin me energji elektrike.
Infrastruktura energjetike është dëmtuar në disa rajone, mes tyre Vinnytsia, Volyn, Kirovohrad, Kiev, Mykolaiv, Zhytomyr, Khmelnytskyi, Kharkiv, Ternopil, Odesa dhe Rivne.
Presidenti ukrainas deklaroi se, përveç objekteve energjetike, sulmet kanë goditur edhe një klinikë mjekësore, një shkollë, një stacion metroje dhe ndërtesa banimi.
Sipas tij, Rusia ka lëshuar 16 raketa balistike në drejtim të Kievit dhe rajonit përreth, si dhe më shumë se 200 dronë të llojeve të ndryshme, përfshirë edhe dronë Shahed me motor reaktiv. Sulmet kanë përfshirë zona nga rajonet Kharkiv dhe Dnipro deri në Volyn, Rivne dhe Odesa.
Zelensky konfirmoi gjithashtu se ka viktima nga sulmet, ndërsa të plagosurit po marrin ndihmën e nevojshme mjekësore. Ai shprehu ngushëllimet për familjet dhe të afërmit e viktimave.
Autoritetet ukrainase vijojnë punën për riparimin e dëmeve dhe rikthimin e furnizimit me energji elektrike në zonat e prekura.
admin5