VMRO-DPMNE ka reaguar ashpër ndaj deklaratave të Andrej Zhernovskit, duke e cilësuar atë si shembull të dështimit kadrovik dhe duke akuzuar SDSM-në se nuk ka asnjë ofertë konkrete për qytetarët. Në shënjestër të kritikave janë edhe kryetari i kësaj partie, Venko Filipçe, si dhe ish-kryeministri Zoran Zaev.
Në reagimin e publikuar përmes agjencisë MIA, VMRO-DPMNE vlerëson se SDSM ndodhet në një qorrsokak politik dhe intelektual, ndërsa deklaratat e saj i cilëson si përpjekje për të përhapur gënjeshtra dhe spekulime.
Partia në pushtet e ka kritikuar veçanërisht Andrej Zhernovskin, duke e quajtur ambasador të parealizuar dhe duke pretenduar se ai prej rreth 20 vitesh ka qenë në pozita të financuara nga shteti.
“Zhernovski është njeri që dëshiron të merret me marrëdhënie ndërkombëtare, por nuk ka njohuri elementare”, thuhet në reagimin e VMRO-DPMNE-së, ku përmenden edhe pretendime për mungesë njohurish rreth NATO-s dhe institucioneve të Bashkimit Evropian.
VMRO-DPMNE akuzon gjithashtu ish-udhëheqësinë e SDSM-së për keqmenaxhim të shtetit dhe për vendosjen e interesave personale mbi interesat e qytetarëve.
VMRO-DPMNE: Maqedonia ka shënuar përparim në disa fusha
Duke komentuar raportin për përparimin e vendit për vitin 2026, partia në pushtet thekson se Maqedonia e Veriut ka shënuar përparim në disa fusha krahasuar me vitin paraprak.
Sipas VMRO-DPMNE-së, rezultatet janë veçanërisht të dukshme në transformimin digjital, kërkimin shkencor, arsimin dhe sundimin e ligjit. Në këtë kontekst, partia i referohet edhe deklaratave të ambasadorit të Bashkimit Evropian, Mihalis Rokas.
Përplasjet për Alta Bankën, pushteti akuzon opozitën për krijim të krizës artificiale
Një pjesë e rëndësishme e reagimit i kushtohet edhe debatit për Alta Bankën.
VMRO-DPMNE i ka bërë thirrje SDSM-së dhe kryetarit të saj, Venko Filipçe, që të ndalojnë, siç thotë, krijimin e një krize artificiale dhe përhapjen e pasigurisë te qytetarët lidhur me sistemin bankar.
Partia pretendon se presioni ndaj Bankës Popullore dhe kritikat ndaj Alta Bankës kanë prapavijë politike, duke akuzuar opozitën se po krijon kushte për marrjen e bankës nga një biznesmen i afërt me SDSM-në.
Në reagim përmendet edhe falimentimi i Eurostandard Bankës, për të cilin VMRO-DPMNE fajëson qeverisjen e mëparshme. Partia rikthen edhe akuzat ndaj ish-ministres së Financave, Nina Angelovska, duke pretenduar se ajo kishte tërhequr 250 mijë euro nga banka pak para mbylljes së saj.
Mickoski garanton: Do të ketë paga dhe pensione, bankat nuk do të falimentojnë
Në përfundim të reagimit, VMRO-DPMNE u bën thirrje qytetarëve të mos shqetësohen për stabilitetin financiar të vendit.
“Derisa kryeministër është Hristijan Mickoski dhe VMRO-DPMNE është në pushtet, paga dhe pensione do të ketë, ndërsa banka nuk do të falimentojnë”, thuhet në reagimin e partisë.
Nga VMRO-DPMNE theksojnë se vendi do të vazhdojë me reformat, tërheqjen e investimeve të reja dhe përmirësimin e standardit jetësor të qytetarëve.
Përplasjet mes pushtetit dhe opozitës vazhdojnë të ashpërsohen, ndërsa ekonomia, sistemi bankar dhe integrimi evropian mbeten ndër temat kryesore të debatit politik në vend.
FAKTI DITOR
admin