‘Zonë e kuqe’ në Islamabad/ Pakistani, masa të larta sigurie për raundin e dytë të mundshëm të bisedimeve SHBA-Iran

Kryeqyteti i Pakistanit, Islamabadi mbetet nën një bllokim të rreptë sigurie, ndërsa nisi një raund të ri diplomacie të fshehtë për të rikthyer SHBA-në dhe Iranin në negociata, thanë burime sigurie.

Rrugët që të çojnë në “zonën e kuqe” të kryeqytetit, ku ndodhen ndërtesa të rëndësishme qeveritare dhe private, përfshirë hotelin me pesë yje, ku u zhvillua raundi i parë i bisedimeve midis Washingtonit dhe Teheranit, mbetën ende të mbyllura për trafikun e përgjithshëm.

Reklame

Të gjitha institucionet arsimore dhe konviktet në Islamabad dhe qytetin ngjitur të Rawalpindi-t janë mbyllur që nga java e kaluar. Transporti publik, përfshirë shërbimet e autobusëve metro, mbetet i pezulluar.

Megjithatë, qeveria rihapi sot dy terminale autobusësh në Rawalpindi, duke lejuar udhëtime të kufizuara ndërqytetas. Një burim sigurie, duke folur në kushte anonimiteti i tha Anadolu-t se qeveria ka urdhëruar agjencitë e zbatimit të ligjit të ruajnë nivelin e sigurisë “deri në njoftim të mëtejshëm”.

Raundi i dytë i bisedimeve ishte planifikuar të zhvillohej këtë javë në Pakistan, por Teherani tha se nuk do të merrte pjesë në takim derisa SHBA-ja të përfundojë bllokadën e saj “të paligjshme” të porteve iraniane.

SHBA-ja kishte njoftuar se do të dërgonin përfaqësuesit e tyre për bisedime, të udhëhequra nga Zëvendëspresidenti JD Vance.

Të martën, presidenti i SHBA-së Donald Trump zgjati armëpushimin dyjavor me Iranin për t’i dhënë kohë Teheranit të përgatiste një “propozim të unifikuar”, pas një kërkese nga zyrtarët pakistanezë.

Washingtoni kërkon rihapjen e Ngushticës së Hormuzit, e cila ka qenë pothuajse e mbyllur që kur SHBA-ja dhe Izraeli filluan sulmet e tyre ndaj Iranit më 28 shkurt.

Teherani e shpalli ngushticën të hapur të premten, por e mbylli atë një ditë më vonë pasi Trumpi njoftoi se bllokada e porteve iraniane do të vazhdonte, dhe të dielën, forcat amerikane ndaluan një anije mallrash iraniane pasi ata hapën zjarr dhe hipën në të.

Pakistani zuri vendin qendror kur ndërmjetësoi një armëpushim dyjavor midis SHBA-së dhe Iranit më 8 prill, i ndjekur nga bisedime kritike në Islamabad ku morën pjesë delegacione të larta nga të dy vendet më 11 dhe 12 prill. Megjithatë, asnjëra palë nuk arriti të arrinte një marrëveshje për t’i dhënë fund luftës në Lindjen e Mesme.

Armëpushimi ishte planifikuar të skadonte sot por Trumpi e zgjati atë pa dhënë ndonjë afat kohor të ri./ AA.